काठमाडौँ – संयुक्त अरब इमिरेट्स (यूएई)मा रहेको नेपाली राजदूतावासले यूएईमा रहेका नेपालीहरूलाई अनावश्यक रुपमा यात्रा नगर्न आग्रह गरेको छ।
दूतावासले शनिबार सूचना जारी गर्दै अनावश्यक यात्रा नगर्न र युएई सरकारले जारी गरेको सुरक्षा मार्गदर्शनलाई पालना गर्न आग्रह गरेको हो।
दूतावासले भनेको छ, ‘मध्यपूर्वमा विकसित परिस्थितिका सन्दर्भमा संयुक्त अरब इमिरेट्समा रहनुभएका नेपाली नागरिकहरूलाई अनावश्यक यात्रामा ननिस्कन, सावधानी अपनाउन, युएई सरकारले जारी गरेको सुरक्षा मार्गदर्शन एवं सूचनाहरुको पालना गर्न अनुरोध गरिन्छ।’
आपतकालीन सुझाव, सल्लाह र सहयोगको लागि नेपाली राजदूतावास अबुधाबी र नेपाली महावाणिज्यदूतावास दुबईमा सम्पर्क गर्न दूतावासले आग्रह गरेको छ।
अमेरिका र इजरायलले इरानमा शनिबार भीषण हमला गरेका छन्। त्यसको जवाफमा इरानले इजरायलका साथै मध्यपूर्वमा रहेका अमेरिकी सैन्य अड्डालाई लक्षित गर्दै मिसाइल हमला गरेको छ।
