बाँके । जनता समाजवादी पार्टी नेपालका अध्यक्ष उपेन्द्र यादवले अहिले मुलुकमा लोकतन्त्र विरोधी शक्तिहरूले संघीय गणतन्त्रलाई समाप्त पार्ने खेल खेलिरहेको आरोप लगाउनु भएको छ । जसपा नेपाल बाँकेको एकताको प्रथम अधिबेशनलाई आज नेपालगंजमा सम्बोधन गर्दै अध्यक्ष यादवले भन्नुभयो, “संघीय गणतन्त्रलाई समाप्त गर्न सडकदेखि सदनसम्म लोकतन्त्र विरोधीहरू षडयन्त्र गरिरहेको रहेका छन् ।” उहाँले मुलुकमा लोकतान्त्रिक गणतन्त्र नभए समानता पनि नहुने जिकिर गर्नु भयो ।
२५० वर्षको निरङकुश शासनमा समानता कतै नभएको उल्लेख गर्दै उहाले भन्नुभयो,मधेश आन्दोलनबाट प्राप्त संघीयतालाई समाप्त पार्न सजिलो नभएको बताउदै भयो ।
सशस्त्र विद्रोह, जनआन्दोलन र मधेश विद्रोहबाट परास्त भै सकेको निरङकुश शासनको कल्पना समेत नगर्न लोकतन्त्र बिरोधीहरुलाई संकेत गर्दै अध्यक्ष यादवले नेपाल बहुजातीय, बहुभाषिक, बहुधार्मिक र बहुसांस्कृतिक विशेषतायुक्त मुलुक भएको बताउदै उहाँले एकल जातीय मुलक कहिले पनि हुन नसक्ने दाबी गर्नु भयो । परिवर्तन पक्षधर शक्तिहरुलाई एकजुट हुन आह्वान गर्दै अध्यक्ष यादवले जनतालाई समेत सचेत हुन आग्रह गर्नु भयो । 
उहाँले भन्नुभयो,‘यो २०१७ साल होइन, २०८२ हो । अहिले जनता सचेत र संगठित छन , संघीयता र गणतन्त्र समाप्त गर्न चाहने शक्तिलाई जनताले समाप्त गरि दिने छन ।’
मुलुक प्रधानमन्त्रीले नभई बिचोलियाहरूले चलाइरहेको आरोप लगाउदै यादवले काग्रेश र एमालेको सरकार कमिसन खोर, दलाल र बिचोलियाहरूको भएको टिप्पणी गर्नु भयो ।
अध्यक्ष यादवले मुलुक अहिले राजनीतिक रूपमा संकट र आर्थिक रुपमा जर्जर अवस्थामा रहेको टिप्पणी गर्दै उहाँले सरकारले संविधान संशोधन गर्ने नाममा जनतालाई ठग्ने काम मात्र गर्दै आएको आरोप लगाउनु भएको थियो ।
कार्यक्रममा जनता समाजवादी पार्टी महासचिव राम कुमार शर्मा, केन्द्रीय सचिव कमरुद्दीन राई, केन्द्रीय सदस्य शैयद इस्तियाक अहमद शाह, अम्बीका काफ्ले लगायतले बोल्नु भएको थियो ।
