बाँके । बाँकेको नरैनापुर गाउँपालिकाको कार्यालय गएराति र आज बुधवार दिउँसो नरैनापुर गाउँपालिकाको वडा नं ६ मा तोडफोड र आगजनी गरी लुटपाट गरे पछि सेवा बन्द गरिएको छ ।
जेनजी अन्दोलनका सहभागी हौँ भन्दै २५ जना भन्दा बढीको संख्यामा आएका स्थानीय युवाहरुले कार्यालयमा आगजनी गरेको गाउँपालिकाले जनाएको छ ।
प्रमुख प्रशासकीय अधिकृत नवराज वलीले फेसबुक मार्फत सूचना जारी गर्दै कार्यालयको महत्वपूर्ण कागजात जलेर नष्ट हुनुका साथै आगजनीका कारण कार्यालयमा क्षति पुगेकोले अर्को सुचना जारी नहुँदा सम्मका लागि सेवा अवरुद्ध भएको जानकारी गराएको छ ।
वडा नं ६ को कार्यालयमा आगजनी गरे पछि वडा अध्यक्ष प्रेम मौर्यको घरमा आगजनी गर्ने पुगेका केहि युवाहरुलाई नेपाली सेनाले नियन्त्रणमा लिएको छ । नरैनापुर गाउँपालिकाको प्रशासनिक काम सकेर फर्किदै गरेका प्रमुख प्रशासकीय अधिकृत सहितको टोली माथि समेत आक्रमणको प्रयास गरे पनि स्थानीयहरुको सहयोगमा उम्किएर नेपालगञ्ज पुगेको छन् । यति बेला नेपाली सेनाले नरैनापुरलाई आफ्नो नियन्त्रणमा लिएको छ भने अपराधीक उपद्रो गर्नेहरुलाई खोजी गरिरहेको छ ।
