कपिलवस्तु । कपिलवस्तु क्षेत्र नम्बर १ मा यसपटकको चुनाव प्रतिस्पर्धा मात्र होइन, नयाँ सम्भावनाहरूको उदय र पुराना आधारहरूको टकराव बनेको छ। परिणाम कसको पक्षमा जाने हो भन्ने विषयमा स्पष्ट अनुमान गर्न कठिन देखिन्छ — यही अनिश्चितताले चुनावलाई अझ रोचक, अर्थपूर्ण र ऐतिहासिक मोडमा पुर्याएको छ।
नेपाली कांग्रेसबाट अतहर कमाल, नेकपाबाट कृष्ण कुवर, रास्वपाबाट मोहन आचार्य, राष्ट्रिय जनमोर्चाबाट माधव भाट क्षेत्री तथा एमालेबाट बिश्राम चौधरी मैदानमा उत्रिएका छन्। यी सबै स्थापित राजनीतिक धारका प्रतिनिधि हुन्, जसले आफ्ना–आफ्ना संगठनात्मक शक्ति, मत आधार र विगतका दाबी प्रस्तुत गरिरहेका छन्।
तर यसपटकको चुनावी बहसमा सबैभन्दा बढी चर्चा बटुल्न सफल भएका पात्रमध्ये एक हुन् — राष्ट्र निर्माण दल नेपालका उम्मेदवार निसार अहमद मुसलमान। नयाँ राजनीतिक धारको प्रतिनिधित्व गर्दै मैदानमा उत्रिएका निसार अहमदले छोटो समयमै स्थानीय तहदेखि बौद्धिक वृत्तसम्म गहिरो छाप छोड्न सफल भएका छन्।
समाजका अगुवा, बुद्धिजीवी तथा सचेत नागरिकहरूसँग गरिएको संवादमा “निसार अहमदलाई हल्का रूपमा लिनु भूल हुन सक्छ” भन्ने धारणा बारम्बार सुनिनु आफैंमा महत्वपूर्ण संकेत हो।
त्यसैबीच, कांग्रेस नेता दीपककुमार उपाध्यायका छोरा आसिस शर्मा स्वतन्त्र उम्मेदवारका रूपमा मैदानमा देखिनुले समीकरणलाई थप रोचक बनाएको छ। युवा मतदातामाझ स्वतन्त्र उम्मेदवार र वैकल्पिक राजनीतिक शक्तिप्रति आकर्षण बढ्दै गएको पृष्ठभूमिमा निसार अहमदको सक्रिय अभियान, घरदैलो कार्यक्रम र स्पष्ट राजनीतिक दृष्टिकोणले उनीलाई निर्णायक खेलाडीको रूपमा स्थापित गर्दै लगेको विश्लेषण हुन थालेको छ।
राजनीतिक क्षेत्रमा उदाउँदै गरेका राष्ट्र निर्माण दल नेपालका संस्थापक उपाध्यक्ष ढकाल पनि एक प्रभावशाली व्यक्तित्वको रूपमा परिचित भइसकेका छन्, जसको संगठनात्मक सक्रियताले निसार अहमदको अभियानलाई थप बल पुगेको देखिन्छ।
इतिहास हेर्दा यो क्षेत्र एमालेले जित्दै आएको छ। विगतको चुनावमा बलराम अधिकारी विजयी भएका थिए र अहिले पनि एमालेको पकड कमजोर छैन। उता कांग्रेसको मत आधार पनि उल्लेख्य छ, र अघिल्लो निर्वाचनमा कांग्रेस दोस्रो स्थानमा सीमित भएको तथ्य स्मरणीय छ। तर यसपटकको चुनावमा केवल पुराना समीकरणले मात्र होइन, नयाँ राजनीतिक चेतना र परिवर्तनको चाहनाले पनि निर्णायक भूमिका खेल्ने संकेतहरू देखिन थालेका छन्।
रास्वपाको प्रभाव अझै निर्णायक तहमा नपुगेको आँकलन भइरहे पनि, निसार अहमदको बढ्दो उपस्थितिले चुनावी गणितलाई नयाँ दिशातर्फ मोड्न सक्ने सम्भावना बलियो बन्दै गएको छ। राजनीतिक विश्लेषकहरूका अनुसार, यदि यही गति कायम रह्यो भने कपिलवस्तु–१ मा मुख्य प्रतिस्पर्धाको केन्द्र नै निसार अहमद मुसलमान बन्ने सम्भावना नकार्न सकिँदैन।
अन्ततः कसले जित्ला भन्ने प्रश्न अझै अनुत्तरित छ। तर अहिलेको संकेतले के प्रस्ट पार्छ भने, कपिलवस्तु क्षेत्र नम्बर १ को चुनाव अब केवल परम्परागत दलहरूको भिडन्तमा सीमित छैन — नयाँ शक्ति, नयाँ नेतृत्व र नयाँ आशाको प्रतीकका रूपमा निसार अहमद मुसलमान निर्णायक भूमिकामा उभिँदै गएका छन्।
जनताको अपेक्षा भने एउटै छ — इमानदार, सक्षम, दूरदर्शी र जनताको आवाज निडर रूपमा संसदमा उठाउन सक्ने नेतृत्व। यही कसौटीमा निसार अहमदको नाम दिनप्रतिदिन गम्भीरताका साथ लिइन थालेको देखिन्छ र यसले यो चुनावलाई अझ चासोका साथ हेरिने प्रतिस्पर्धामा परिणत गरेको छ।
