काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले प्रधानमन्त्री शेरबहादुर देउवालाई एमसीसी पास गर्ने हो भने सरकार र गठबन्धनमा नरहने भनेका छन् ।
प्रधानमन्त्री देउवा जसरी पनि एमसीसी पारित गर्ने पक्षमा देखिएको भन्दै प्रचण्डले प्रधामन्त्री देउवालाई बरु सरकार र गठबन्धन छोड्न तयार रहेको तर एमसीसी पारित गर्ने पक्षमा नरहेको बताएका हुन् ।
प्रधानमन्त्री देउवा र अध्यक्ष प्रचण्डले एमसीसीलाई केही महिना अगाडि लेखेको पत्र सार्वजनिक भएसँगै प्रचण्डले फोन गरेर प्रधानमन्त्रीलाई आफू एमसीसी पारित गर्ने पक्षमा नरहेको बताएका हुन् ।
बेला घर्काएर एमसीसी फिर्ता गराउने योजनासहित केही महिना अगाडि लेखिएको पत्र समय घर्केपछि प्रधानमन्त्रीकै चाहनामा सार्वजनिक गरिएको खुमलटारको धारणा रहेको छ । खुमलटार स्रोतले भने– ‘पारित नगर्ने साल्लाह बमोजिम बेला घर्काएर एमसीसी फिर्ता गराउने योजनासहित पत्र लेखिएको थियो । त्यो पत्रमा भनिएको समय पनि घर्किसक्यो । समय घर्केपछि पत्र सार्वजनिक गर्नुको अर्थ दबाब दिएर एमसीसी पारित गर्न खोज्नु हो । त्यो कुनै पनि अवस्थामा स्वीकार्य छैन ।’
पत्र सार्वजनिक भएसँगै प्रचण्डले देउवालाई फोन गरेर भने– ‘तपाई जसरी पनि एमसीसी पारित गर्ने पक्षमा हुनुहुन्छ भन्ने प्रष्ट भयो । यदि, त्यो हो भने ओली (केपी शर्मा ओली)सँग मिलेर पारित गर्नुस् । हामी सरकारमा रहन्नौ ।’
पछिल्लो समय प्रधानमन्त्री देउवा जसरी पनि एमसीसी पारित गर्ने पक्षमा देखिएका छन् । नेकपा एमालेले समेत एमसीसी पारित गर्ने हो भने सहयोग गर्न तयार रहेको तर त्यसका लागि वर्तमान सत्ता गठबन्धन तोड्नुपर्ने सर्त राख्दै आएको छ ।
