बाँके । बाँकेको जानकी गाउँपालिका वडा नं. ५ अन्तर्गत बनिया गाउँ भित्रका सम्पूर्ण कोलिया बाटो, मुख्य सडक, नाली, ढक्कन ढलान तथा जीर्ण पोल जडानसहितको निर्माण कार्य औपचारिक रूपमा शिलान्यास गरिएको छ।
मंगलबार आयोजित कार्यक्रममा गाउँपालिका अध्यक्ष छब्बन खाँ, उपाध्यक्ष राम प्यारी यादव तथा वडा नं. ५ का अध्यक्ष एवं गाउँपालिकाका प्रवक्ता टिकानाथ यादवले संयुक्त रूपमा सडक तथा पूर्वाधार निर्माण कार्यको शिलान्यास गर्नुभएको हो ।
कुल १ करोड ५० लाख रुपैयाँ लागतमा सुरु गरिएको उक्त निर्माण कार्यको ठेक्का श्री आर जे कन्स्ट्रक्सन, नारायण–०१ दैलेखले पाएको छ । लुम्बिनी प्रदेश सरकारको समपुरक योजनाबाट सुरु गरिएको यो निर्माण कार्य चालु आर्थिक वर्षभित्रै सम्पन्न गर्न अध्यक्ष खाँले ठेकेदार कम्पनीलाई निर्देशन दिनुभएको छ ।
उद्घाटन कार्यक्रममा बोल्दै गाउँपालिका अध्यक्ष खाँले निर्वाचन सम्पन्न भएलगत्तै पालिकाको विकास निर्माण कार्यलाई तीव्रता दिइएको बताउनुभयो । उहाँले पालिकाभित्रका सडक तथा पूर्वाधार विकासलाई प्राथमिकतामा राखेर काम अघि बढाइएको उल्लेख गर्नुभयो ।
त्यस्तै वडा नं. ५ का अध्यक्ष टिकानाथ यादवले वडाभित्रका साना–ठूला सबै सडकको निर्माण आफ्नो कार्यकालमै सम्पन्न गर्ने लक्ष्यका साथ योजना अघि बढाइएको बताउनुभयो। उहाँले बनिया गाउँका सडक निर्माणले स्थानीय बासिन्दालाई आवागमनमा ठूलो सहजता मिल्ने विश्वास व्यक्त गर्नुभयो।
कार्यक्रममा कान्ति काँदु, सरिफ खान, प्रजेश आले, बिबस श्रेष्ठ, शिया यादव, दिपक भुज्वालगायत स्थानीय बासिन्दाको उपस्थिति रहेको थियो ।
