बर्दिया । बाँकेसंग सीमा जोडिएको बर्दिया जिल्लामा पनि दादुरा रुवेलाका विरामी भेटिए पछि बिश्व स्वास्थ्य संगठनको प्रत्यक्ष निगरानीमा खोप लगाउन सुरु गरिएको छ ।
जिल्लाको गुलरिया नगरपालिका २ मा १ जना र बढैयाताल गाँउपालिकामा ४ जना, राजापुर नगरपालिकामा १ जना र बारबर्दिया नगरपालिकामा १ जना गरी जम्मा ७ जनामा दादुरा रुवेला देखिएको जिल्ला स्वास्थ्य कार्यालय बर्दियाका प्रमुख गोकर्ण गिरीले बताउनु भयो ।
बढैयाताल गाँउपालिकाको १ मा १३ बर्षिय बालिका, १ वर्षिय बालक, वार्ड न २ मा १ वर्षिय बालक र वार्ड न ७ मा ३५ वर्षिय महिलामा दादुरा रुवेला देखिएको छ ।
यसैगरी राजापुर नगरपालिका ४ मा १३ बर्षिय बालिका र बारबर्दिया नगरपालिका ८ औरीमा १३ महिना बालिकामा दादुरा देखिएको हो । विरामी सबैको स्वास्थ्य अवस्था सामान्य रहेको छ ।
बढैयाताल गाउँपालिकाका स्वास्थ्य शाखा प्रमुख विष्णु पौडेलले प्रभावित वडाहरुमा आइतवारबाट खोप अभियान संचालन गरिएको बताउनु भयो । गुलरिया नगरपालिकाका स्वास्थ्य शाखा प्रमुख सुनिल पाण्डेले थप केहि दादुराको लक्षण देखिएकाको स्याम्पल संकलन गरिएको बताउनु भयो ।
