बाँके । नेपालगञ्ज बिमानस्थलमा काल्पनिक बिमान दुर्घटना तथा उद्दार प्रतिकार्य अभ्यास गरिएको छ ।
नेपालगञ्जज उपमहानगरपालिका वडा नम्बर २० राँझास्थित नेपालगञ्ज बिमानस्थलमा काल्पनिक बिमान दुर्घटना तथा उद्दार प्रतिकार्य अभ्यास गरिएको हो । विमान दुर्घटना हुँदा गरिनुपर्ने छिटो छरितो उद्दार, क्षती न्यूनीकरण र प्रतिकार्यको काम कसरी गर्ने भन्ने विषयमा कृत्रिम घटना अभ्यास गरिएको जिल्ला प्रहरी कार्यालय बाँकेका प्रहरी उपरीक्षक तुलबहादुर कार्कीले बताउनु भयो । 
नेपाली सेना, नेपाल प्रहरी, नेपाल प्रहरी अस्पताल, सशस्त्र प्रहरी, नागरिक उड्यनका पदाधिकारी, नेपाल रेडक्रस सोसाइटी बाँकेका पदाधिकारी, मिडियाकर्मी लगायतको उपस्थिति र सहकार्यमा काल्पनिक बिमान दुर्घटना तथा उद्दार प्रतिकार्य अभ्यास गरिएको हो ।
विमानस्थलमा कुनै दुर्घटना भएमा कसरी उद्धार गर्ने भनेर गरिने पूर्व तयारीका बारेमा सिकाउनका लागि प्रत्येक बर्ष अभ्यास गर्दै आएको प्रहरीले जनाएको छ । सिकाइको क्रममा नेपालगञ्ज विमानस्थल क्षेत्रमा धुवाको कालो मुस्लो देखिएको थियो । अभ्यासको क्रममा २ वटा दमकल र एम्बुलेन्सको साइरन सुनिएको थियो । अभ्यासका लागि सुरक्षाकर्मी, स्वास्थ्यकर्मी र एम्बुलेन्स तैनाथ थिए । जहाज दुर्घटनाको अभ्यासपछि हवाई सुरक्षासम्बन्धी विविध गतिविधि जानकारी गराइएको थियो।
