बाँके । जानकी गाउँपालिका–५ मा आज (बुधवार)देखि सुरु भएको कार्तिक पूर्णिमा नहान मेलाको उद्घाटन गाउँपालिका अध्यक्ष छब्बन खानले गर्नुभयो । धार्मिक आस्था र सांस्कृतिक एकताका प्रतीकका रूपमा आयोजित यो मेलामा आज बिहानदेखि भक्तजनहरूको उल्लेख्य भीड लागेको छ ।
उद्घाटन समारोहमा बोल्दै अध्यक्ष खानले कार्तिक पूर्णिमालाई धार्मिक, सांस्कृतिक र सामाजिक सद्भाव सुदृढ पार्ने अवसरको रूपमा लिनुपर्ने बताउनुभयो । उहाँले भन्नुभयो,“कार्तिक पूर्णिमाको नहानले न केवल आत्मिक शुद्धता दिन्छ, यसले हाम्रो परम्परा, आस्था र सामुदायिक एकतालाई पनि बलियो बनाउँछ । गाउँपालिकाले यस वर्ष मेलाको व्यवस्थापन र सुरक्षामा विशेष ध्यान दिएको छ ।” मेलाको उद्घाटन कार्यक्रममा प्रमुख प्रशासकीय अधिकृत परसुराम उपाध्याय लगायतको सहभागिता रहेको थियो ।
मेलामा धार्मिक स्नान, भजन–कीर्तन, सांस्कृतिक कार्यक्रम र स्थानीय उत्पादनको प्रदर्शन जस्ता विभिन्न आकर्षणहरू रहने जनाइएको छ ।
