बाँके । एमाले निकट नेपाल मुस्लिम इत्तेहाद सङ्गठनको केन्द्रीय अधिवेशन २०८२ वैशाख २०–२१ नेपालगञ्जमा आयोजना गरिने भएको छ ।
सम्मेलनको तयारीका विषयमा जानकारी दिन आयोजित पत्रकार सम्मेलनमा सङ्गठनका इन्चार्ज तथा नेकपा एमाले केन्द्रीय सदस्य मोहम्मद हारुम हल्वाईले नेपाली मुस्लिम समुदायको पहिचान र अधिकार प्राप्तिको लागि नेकपा एमालेको जनवर्गीय सङ्गठनको रुपमा २०४८ सालमा स्थापित भएको नेपाल मुस्लिम इत्तेहाद सङ्गठन विभिन्न खाले आरोह अवरोह पार गर्दै पार्टीको सिद्धान्त, नीति, विचार समुदायसम्म पुर्याउने काम गर्दै आएको बताउनु भयो ।
उहाँले सङ्गठनले मुस्लिम समुदायको पक्षका पैरवी गर्ने, पक्षधरका विषयमा काम गर्ने, समुदायको हित, समुदायको अधिकारका लागि वकालत गर्ने सङ्गठन भएको र राजनीतिक, सामाजिक, आर्थिक पक्षमा बहसहरू चलाई समुदायका हक अधिकार सदन देखि सडकसम्म पुराउने कार्य पनि गरिरहेको स्पष्ट पार्नु भयो ।
सङ्गठनको केन्द्रीय अधिवेशन नेकपा एमालेका केन्द्रीय अध्यक्ष, तथा प्रधानमन्त्री केपी शर्मा ओलीले उद्घाटन गर्ने कार्यक्रम तय भएको छ भने कार्यक्रममा पार्टी महासचिव शङ्कर पोखरेलको विशेष राजनीतिक प्रशिक्षण रहने आयोजकले जनाएको छ ।
अधिवेशनमा ४२ जिल्लाबाट ६ सय प्रतिनिधिको सहभागिता रहने छ । अधिवेशन सफल बनाउनका लागि पत्रकार, बुद्धिजीवी, बाँकेवासी आम नागरिक, अन्य आस्थाका सङ्गठनलाई अपिल गरिएको अध्यक्ष सफिक बेहनाले जानकारी दिनुभयो ।
