बाँके । इस्लाम धर्मावलम्बीहरूको प्रवर्तक मोहम्मद पैगम्बरका नाती हजरत हुसैनसहितको सम्झनामा हुने मोहर्रम पर्व एवं ताजिया मेला शनिबार विधिवत रूपमा सम्पन्न भएको छ ।
घरघरमा बनाइएका ताजियाहरु नजिकको कर्बला(रण)मा पुगेर बिभिन्न परम्परागत खेल तमासा तथा ताजियालाई बिभिन्न सामग्री अर्पण गरि यो पर्व सम्पन्न भएको छ । बाँकेको नेपालगञ्जको फुल्टरक्रामा ताजिया बिसर्जन गरिएको थियो भने नरैनापुरको बिभिन्न वडाबाट आएका ताजिय नरैनापुर चोकमा राखि तलवारवाजी लगायतका खेलहरु देखाई सम्पन्न भएको थियो ।
भाकल गर्नेहरुले आफ्नै लागतमा ठूलो ताजिया बनाउने प्रचलन रहेको छ । सन् ६८० अक्टोबर १० तारिखका दिन इराकको राजधानी बगदादभन्दा सय किलोमिटर टाढा उत्तर पूर्वको करबलामा यजीदी फौजसँगको धर्मयुद्धमा सहादत प्राप्त गरेको सम्झनामा ताजिया बनाई मोहर्रम मनाउने परम्परा शुरु भएको हो । मुहर्रम हिजरी संवतको पहिलो महिना हो ।
मोहर्रम पर्व सौहार्दपूर्ण तरिकाले सम्पन्न गराउन भुमिका निर्वाह गर्नु हुने सुरक्षाकर्मी, स्थानीयबासी, राजनितिक दलका नेताहरु, पत्रकार र विभिन्न धर्मका अगुवाहरुलाई नरैनापुर गाउँपालिकाका अध्यक्ष शैयद इस्तियाक अहमद शाहले धन्यवाद दिनु भयो ।
