बाँके । बाँकेका प्रमुख जिल्ला अधिकारी धर्मराज जोशीमाथि जुवातास, अनैतिक गतिविधि र गैरकानुनी कारोबारमा संलग्न व्यक्तिहरूमाथि कारबाही नगर्न दबाब दिने केही सिमित व्यक्तिहरूको प्रयास असफल भएको छ ।
प्रजिअ जोशीले “कानुनभन्दा माथि कोही हुँदैन” भन्ने अडान लिएर अपराध नियन्त्रणमा दृढता देखाएपछि, सोही समूहले २१ जनाको नाममा १८ जनाको हस्ताक्षरसहित गृहमन्त्रीलाई ज्ञापनपत्र पठाउँदै जोशीमाथि कारबाहीको माग गरेका थिए।
तर यसको प्रतिकारस्वरूप जेनजी पुस्ता, नागरिक समाज, शिक्षक, कर्मचारी, पत्रकार, जनप्रतिनिधि, व्यवसायी, महिला अधिकारकर्मी, मानवअधिकारकर्मी, कानुन व्यवसायी र सर्वसाधारण नागरिकले प्रधानमन्त्री र गृहमन्त्रीलाई संयुक्त ज्ञापनपत्र बुझाए ।
ज्ञापनपत्रमा प्रजिअ जोशी बाँकेमा आएदेखि अपराध नियन्त्रणमा उल्लेखनीय कमी आएको, धार्मिक सद्भाव बलियो बनेको र प्रशासन जनमुखी ढंगले सञ्चालन भएको उल्लेख गरिएको थियो ।
साथै, उनीहरूले सिमित व्यक्तिको दबाबमा इमानदार र निष्पक्ष प्रशासकलाई कारबाही वा सरुवा गर्न खोजिए जनताको विश्वासमा आघात पुग्ने चेतावनी दिएका छन्। “यदि जनमुखी प्रशासकलाई कमजोर पार्ने प्रयास गरियो भने, यो जेनजी आन्दोलनको मर्मविपरीत हुनेछ,” ज्ञापनपत्रमा भनिएको छ।
उक्त घटनापछि गृह मन्त्रालयले प्रजिअ धर्मराज जोशीलाई निर्धक्क भएर काम गर्न निर्देशन दिएको छ । मन्त्रालयका स्रोतका अनुसार, “जोशीले जनताको पक्षमा काम गरेका छन्, त्यसैले उनलाई हतोत्साहित गर्ने कुनै पनि प्रयास स्वीकार्य हुने छैन।”
बाँकेमा हालका दिनमा अपराध नियन्त्रण, सुदृढ प्रशासनिक शान्ति र धार्मिक सौहार्द कायम गर्न जोशीको भूमिकाको सर्वत्र प्रशंसा भइरहेको छ।
स्थानीय नागरिक भन्छन् - “कानुनको शासन बलियो पार्ने अधिकारीलाई धम्की होइन, समर्थन चाहिन्छ।” उनीहरुले राम्रो काम गर्ने प्रशासक र कर्मचारीहरुको मनोवल कमजोर हुन नदिने बताएका छन् ।
उनीहरूले प्रजिअ धर्मराज जोशीलाई नागरिक समाजको नाममा समाजमा भय र भ्रम फैलाउने सीमित व्यक्तिहरूसँग कुनै प्रकारको संवाद नगर्न आग्रह गरेका छन्। साथै, बाँके जिल्लामा तस्करी, भ्रष्टाचार र अनैतिक क्रियाकलाप नियन्त्रणमा अझ प्रभावकारी रूपमा केन्द्रित रहन सुझाव दिएका छन्। जनताको समर्थन र विश्वासका साथ निष्पक्ष प्रशासनिक कार्य अघि बढाउन प्रेरणा दिएका उनीहरूले जोशीको नेतृत्वमा बाँकेमा सुशासन र कानुनी शासनको अभ्यास झन् सुदृढ हुने विश्वास पनि व्यक्त गरेका छन्।
