बाँके । आगामी फागुन २१ गते हुने प्रतिनिधि सभा सदस्य निर्वाचन नजिकिँदै जाँदा बाँके क्षेत्र नम्बर २ मा चुनावी सरगर्मी बढेको छ। यही माहोलबीच नेपाली कम्युनिष्ट पार्टीका तर्फबाट उम्मेदवार बनेका दिपेन्द्र बिष्ट मतदाताको ढोका/ढोका पुग्दै, वर्षौंदेखि थन्किएका गाउँलेका पीडा र अपेक्षाहरू सुन्ने अभियानमा जुट्नुभएको छ ।
शनिबार डुडुवा गाउँपालिकाको वडा नम्बर २ अन्तर्गत जाफर पुर्वा पुग्नुभएका बिष्टले कृषि, स्वास्थ्य, सडक, पुल, खानेपानी र युवालाई रोजगारी जस्ता गाउँलेको दैनिकीसँग जोडिएका विषयलाई आफ्नो प्रमुख एजेन्डा बनाउँदै जनतासँग संवाद गर्नुभयो ।
गाउँलेले वर्षौंदेखि भोग्दै आएको अभाव र उपेक्षाप्रति आवाज उठाउँदै बिष्टले “अब गाउँ सम्झिने प्रतिनिधि चाहिएको” भन्दै तारा चुनाव चिन्हमा मतदान गरी विजयी गराउन अपिल गर्नुभयो ।
कार्यक्रममा उपस्थित स्थानीयले खुलेर आफ्ना गुनासा राखे। डुडुवा गाउँपालिकाका स्थानीय नजिर अलि भन्छन्,“यहाँबाट धेरै नेता जितेर गएका छन्, तर चुनावपछि उनीहरू गाउँ फर्केर आएनन्। भोट माग्न आउँछन्, तर हाम्रो दुःख बुझ्दैनन्। बाटो, खानेपानी, बिजुली र रोजगारीको कुरा हरेक चुनावमा सुन्छौं, तर हाम्रो जीवन उस्तै छ ।”
उनको भनाइमा गाउँलेको मनोभाव स्पष्ट देखिन्थ्यो,“जो नेता हाम्रो कुरा सुन्छ, हाम्रो समस्या समाधान गर्छ भन्ने विश्वास दिलाउँछ, हामी फेरि उसैलाई भोट दिन तयार छौं ।”
स्थानीयवासीहरूले यसपटक पुराना नेताबाट होइन, नयाँ सोच र इमानदार उम्मेदवारबाट परिवर्तन खोज्ने प्रतिबद्धता जनाएका छन् ।
यही भावनालाई सम्बोधन गर्दै उम्मेदवार दिपेन्द्र बिष्ट ले भन्नुभयो,“विगतमा यहाँका समस्या बेवास्ता गरियो। त्यसैले मैले समग्र विकासको संकल्पसहित उम्मेदवारी दिएको हुँ। गाउँलेको भरोसालाई काममा बदल्नेछु ।”
चुनावी प्रचार–प्रसारमा बिष्टसँगै समानुपातिक उम्मेदवारद्वय कालि मियाँ ‘कसमीरा’ र जामिया खातुन समेत सहभागी रहेका छन्। पार्टीका सचिव डिल्ली नराल ले गाउँ–गाउँ पुगेर जनताको आवाज सुन्ने अभियानलाई अझ सशक्त बनाइने जानकारी दिनुभयो । 
गाउँलेको भरोसा, विकासको अपेक्षा र परिवर्तनको चाहना बोकेको बाँके २ मा यसपटक चुनाव केवल मतको होइन, विश्वास र भविष्यको परीक्षा बन्दै गएको छ ।
