काठमाडौँ । उज्यालो नेपाल पार्टीको संगठन विस्तारलाई गति दिने उद्देश्यसहित सप्तरी–काठमाडौं सम्पर्क मञ्च औपचारिक रूपमा गठन गरिएको छ। शनिबार नयाँ बानेश्वरस्थित इन्द्रेणी कम्प्लेक्स भवनमा आयोजित समारोहमार्फत इन्जिनियर डा. दिपक चौधरीको नेतृत्वमा ९ सदस्यीय समिति घोषणा गरिएको हो।
कार्यक्रमका प्रमुख अतिथि मन्त्री तथा उज्यालो नेपालको लोकप्रिय नेतृत्व कुलमान घिसिङ, र विशिष्ट अतिथि उज्यालो नेपाल पार्टीका अध्यक्ष अनुप कुमार उपाध्यायको उपस्थितिमा सम्पन्न उक्त कार्यक्रममा संगठन सुदृढीकरण, समन्वय र जनस्तरसँगको पहुँच विस्तारबारे महत्वपूर्ण धारणा राखिएको थियो । समारोहमा पार्टीका केन्द्रीय सदस्य डा. तारा जोशी र इन्जिनियर तेज प्रसाद यादव पनि सहभागी थिए।
सम्पर्क मञ्च गठन समारोहलाई सम्बोधन गर्दै मन्त्री घिसिङले देश विकासका लागि इमानदार नेतृत्व, पारदर्शिता र व्यवहारिक राजनीतिक अभ्यास अपरिहार्य भएको उल्लेख गर्दै नवगठित समितिले काठमाडौंमा रहेका सप्तरीवासी तथा समर्थकमाझ संगठनात्मक सक्रियता बढाउने विश्वास व्यक्त गरे ।
करीब २०० जनाभन्दा बढीको सहभागिता रहेको कार्यक्रममा मञ्चले आगामी कार्यक्रम, कार्ययोजना तथा सदस्य विस्तारबारे प्रारम्भिक खाका प्रस्तुत गरेको थियो।
