नरैनापुर । आपसी सद्भाव, धार्मिक सहिष्णुता, राष्ट्रिय एकतालाई जोड्दै राष्ट्रिय गानसँगै नरैनापुरमा मुस्लिम समुदायले ‘मोहम्मद डे’ मनाएका छन् । मुस्लिम समुदायको धर्म प्रवर्तक पैगम्बर मोहम्मदको जन्मदिनको अवसरमा ‘मोहम्मद डे’ मनाइएको हो ।
मुस्लिम समुदायले राष्ट्रिय गान सहित कार्यक्रम शुभारम्भ गरी नरैनापुरको कटकुइया, लक्ष्मणपुर, बालापुर, मटेहिया, जमुनीबाट निस्किएको जुलुस लक्ष्मणपुर पुगेर एकिकृत भई समापन भएको थियो ।
राष्ट्रिय एकताका लागि नेपालको राष्ट्रिय झण्डा सहित इस्लाम धर्मको झण्डा बोकेका मुस्लिम समुदायले यस पटक मोहम्मद डे लाई आपसी सद्भाव र धार्मिक स्वतन्त्रता र राष्ट्रिय अखण्डता र भाइचारा कायम गर्दै मनाउँदा सबै वर्ग र समुदायबिच आपसी सम्बन्ध प्रगाढ हुने भन्दै सोही अनुरुप मनाएको नरैनापुर गाउँपालिका अध्यक्ष एवं मुस्लिम अगुवा इश्तियाक अहमद शाहले जानकारी दिए ।
केहि तत्वहरु पालिकामा धर्मको नाममा केही उच्छृङ्खल व्यक्तिहरूले विखण्डन ल्याउन खोजेको भन्दै नेपालीहरू बिचको आपसी सद्भावलाई कुनै शक्तिले फुटाउन नसक्ने मुस्लिम अगुवा इश्तियाक अहमद शाहले बताए ।
नरैनापुर गाउँपालिकाले ‘मोहम्मद डे’ मनाउन आज सार्वजनिक बिदा समेत दिएको छ । नरैनापुर गाउँपालिकाको बुधबार बसेको बैठकले पालिका भरि बिदा दिने निर्णय गरेको थियो ।
इस्लामी पात्रो हिजरी सम्वतको रब्बीअव्वल महिनामा साउदी अरबको मक्कामा बिबि आमिनाको कोखबाट हजरत मोहम्मदको जन्म भएको दिनको सम्झनामा मोहम्मद डे मनाइँदै आएको नरैनापुर १ का वडा अध्यक्ष इसाक जोलाहले जानकारी दिए । नरैनापुरमा निकालिएको र्यालीमा बिभिन्न राजनितिक दलका नेताहरु, हिन्दु अगुवा र मुस्लिमहरुको बाक्लो उपस्थिति रहेको थियो ।ा
