बाँके । नरैनापुर गाउँपालिका–१ कटकुइयामा रहेको कटकुइया स्वास्थ्य चौकीले स्वास्थ्य सेवा मात्र होइन, समुदायस्तरमै सरसफाइ र स्वास्थ्य सचेतना फैलाउने अभियान सुरु गरेर उदाहरणीय काम गरेको छ। स्वास्थ्य संस्थाको पहुँचभन्दा टाढा रहेका नागरिकलाई घरमै पुगेर सेवा दिँदै आएको स्वास्थ्य चौकीले अब टोलटोलमा पुगेर सरसफाइ अभियानसमेत थालेको हो।
फरक क्षमता भएका व्यक्ति, ज्येष्ठ नागरिक, गर्भवती तथा सुत्केरी महिला, बालबालिका र स्वास्थ्य सेवाबाट वञ्चित समुदायलाई प्राथमिकतामा राखेर अभियान सञ्चालन भइरहेको स्वास्थ्य चौकीका इन्चार्ज दिनेश मौर्यले जानकारी दिनुभयो।
उहाँका अनुसार स्वास्थ्य चौकीभित्र बसेर मात्रै सेवा प्रवाह गर्नुपर्छ भन्ने परम्परागत सोचलाई परिवर्तन गर्दै समुदायमै पुगेर सेवा र सचेतना दिने उद्देश्यले अभियान अघि बढाइएको हो ।
“स्वास्थ्य सेवा केवल स्वास्थ्य चौकीसम्म सीमित हुनु हुँदैन भन्ने सन्देश दिन हामी घरदैलोमै पुगेका छौँ,” मौर्यले भन्नुभयो, “अब स्वास्थ्यसँगै सरसफाइलाई पनि जनचेतनाको मुख्य अभियान बनाएका छौँ ।”
अभियानअन्तर्गत स्वास्थ्यकर्मीहरू टोलमा पुगेर सरसफाइ गर्नुका साथै नागरिकलाई हात धुने सही तरिका, व्यक्तिगत सरसफाइ, झाडापखाला, डेंगु लगायत मौसमी रोगबाट बच्ने उपायबारे जानकारी दिइरहेका छन्।
वडा नम्बर १ का अध्यक्ष इसाक जोलाहले स्वास्थ्यकर्मीहरूको सक्रियता प्रशंसनीय रहेको बताउँदै यसले समुदायमा सकारात्मक सन्देश फैलाएको उल्लेख गर्नुभयो ।
“स्वास्थ्यकर्मीहरू आफैं टोलमा सफाइ गर्दै नागरिकलाई सचेत गराउनु निकै उदाहरणीय काम हो,” उहाँले भन्नुभयो, “यसले संक्रामक रोग नियन्त्रण र नागरिकको जीवनस्तर सुधारमा प्रत्यक्ष प्रभाव पार्नेछ ।”
