काठमाडौं । स्वास्थ्यमन्त्री निशा मेहताविरुद्ध आलोचनात्मक टिप्पणी गरेको आरोपमा प्रहरीले धनुषाका एक जना स्वास्थ्यकर्मीलाई सोधपुछ गरेको छ ।
सामाजिक सञ्जालमा मन्त्री मेहताको आलोचना गरेका हेल्थ असिस्टेन्ट नवेश अधिकारीलाई धनुषा प्रहरीले सोमबार साँझ जनकपुरधामको पिडारी चोकबाट नियन्त्रणमा लिएको थियो ।
धनुषा स्थित एक निजी स्वास्थ्य संस्थामा काम गर्दै आएका अधिकारीले स्वास्थ्यकर्मी सेवा सुविधा बढाउन माग गर्दै मन्त्रीको राजीनामा माग्दै सामाजिक सञ्जालमा पोस्ट गरेका थिए । अधिकारीले शनिवार स्वास्थ्यमन्त्री मेहताको तस्वीर रातो मसिले क्रस गर्दै ‘माफिया मन्त्री’ उल्लेख गरेर पोस्ट गरेका थिए ।
त्यसपछि उनलाई प्रहरीले नियन्त्रणमा लिएको थियो । तर, उनीविरुद्ध हालसम्म कुनै ठोस प्रमाण वा औपचारिक उजुरी नपरेकाले सम्झाइबुझाइ आज छाडिएको धनुषाका एसपी रुपेश खड्काले जानकारी दिए ।
