मेयर आचार्यले भनेको ठाउँमा परीक्षा केन्द्र नपरेपछि प्रजिअ रिजालको चरित्र हत्या गरे

बाँके । कोहलपुर नगरपालिकाका मेयर पुर्णप्रसाद आचार्यले आफूलाई ‘भ्रष्ट’ भन्दै फेसबुकमा गालीगलौज गरेपछि बाँकेका प्रमुख जिल्ला अधिकारी खगेन्द्रप्रसाद रिजालले प्रमाण ल्याएर आरोप पुष्टि गर्न चुनौती दिएका छन् ।

हिजो बिहिबार अख्तियार दुरुपयोग अनुसन्धान आयोगमा सरुवा भएका प्रजिअ रिजाललाई मेयर आचार्यले नैतिकरूपमा भ्रष्ट भएको र समाजलाई चौपट पार्न खोजेको गम्भीर आरोप लगाउँदै लामो स्टाटस लेखेका थिए । रिजालमाथि एसईईको परीक्षा केन्द्र निर्धारण गर्दा केही संस्थागत विद्यालयसँग सौदावाजी गरेको मेयर आचार्यले आफ्नो फेसबुक मार्फत् आरोप लगाएका छन् ।

मेयर आचार्यको स्टाटसलाई लिएर प्रजिअ रिजालले मेयरको स्वार्थ पूरा नभएपछि आफूमाथि खनिएको बताए ।

उनले भने, "मेयरले भनेको स्कूलमा सेन्टर परेन । उसको स्वार्थ पूरा भएन । त्यसैले फेसबुकमा लेखेको हो ।"

रिजालले मेयर आचार्यलाई प्रमाण लिएर आउन र प्रमाण ल्याउन नसके कानूनी कारवाही गर्ने भनिसकेको बताए ।

मैले मेयरलाई प्रमाण ल्याएर आउन भनिसकेको छु । यदि उसले प्रमाण ल्याउन सकेन भने कानूनी कारवाही गर्छुु, प्रजिअ रिजालले भने ।

मेयर आचार्यले आफूले भनेको ठाउँमा परीक्षा केन्द्र नपरेपछि आफ्नो चरित्र हत्या गर्न खोजेको रिजालको भनाई छ ।

स्वच्छ छवि बनाएका प्रजिअ रिजालको चरित्र हत्या गर्ने उद्देश्यले मनगढन्ते र कपोलकल्पित स्टाटस सामाजिक सञ्जालमा जथाभावी रूपमा प्रचारप्रसार गर्ने मेयर आचार्यलाई कानूनी दायरामा ल्याई उचित दण्ड सजाय गर्नुपर्ने माग उठेको छ । सार्वजनिक नैतिकता, शिष्टाचार विरुद्धका सामग्री प्रकाशन, प्रसारण गरेकोले मेयर आचार्यलाई विद्युतीय कारोवार ऐन, २०६३ अन्तर्गत कारवाही गर्न सामाजिक संजाल प्रयोगकर्ताहरुले माग गरेका छन् ।