नेपालगञ्ज । मानिसको जीवनमा गाँस, बास र कपास आवश्यक भएजस्तै योग अभ्यास रहेको नेपालगञ्जका मेयर प्रशान्त बिष्टले बताउनुभएको छ ।
जसरी गाँस, बास र कपासले मानिसको जीवनमा मुख्य योगदान मानिन्छ त्यसरी नै योगाभ्यासको पनि योगदान रहेको मेयर बिष्टले बताउनुभयो ।
योग समिति नेपालले पाँचौ स्थापना दिवसको अवसरमा आयोजना गरेको कार्यक्रमलाई सम्बोधन गर्दै उहाँले मानव जीवनलाई स्वस्थ, सन्तुलित, तन्दुरुस्त र सुन्दर बनाउन योग अपरिहार्य रहेको बताउनुभएको हो ।
नियमित योगले मात्र मानव जीवन स्वस्थ रहन सक्ने भन्दै मेयर बिष्टले आफ्नो दैनिक जीवनको केही समय योगका लागि छुट्ट्याएर स्वस्थ जीवनशैलीका लागि प्रतिबद्ध रहन आग्रह गर्नुभयो । उहाँले योगको राष्ट्रिय सम्मेलन नेपालगञ्जमा गर्न आग्रह गर्नु भएको थियो । योग समिति नेपालका अध्यक्ष एवं योग गुरु गिरिराज भट्टराईले नियमित योग विनाको जीवनशैली अब कल्पना पनि गर्न नसकिने बताउनुभयो । भट्टराईले नेपालगञ्जका विभिन्न स्थानमा नियमित योग गराउँदै आउनुभएको छ ।
योग समिति नेपालले नेपालगञ्जका बिभिन्न क्षेत्रसंगै जिल्लाका तमाम स्थानहरुमा योग संस्कृतिको विकास गरेको छ । योग गर्ने मानिसहरुको संख्या दिनप्रतिदिन बढ्दै गएको छ ।
२०७६ साल जेष्ठ १० गते स्थापना भएको योग समिति नेपालले बाँके जिल्लाका साथै बर्दिया, कपिलबस्तु र नवलपरासीमा पनि योग अभ्यास बिस्तार गरेको छ ।
समितिले स्थापना दिवसको अवसरमा बिभिन्न व्यक्तिहरुलाई सम्मान प्रदान गरेको छ । कार्यसमितिमा रहेर उल्लेखनीय भूमिका निर्वाह गर्नुहुने योग गुरु निर्मला शाह, कार्यमूल्याँकनको आधारमा योग गुरु प्रेम केसी, प्रमोद अग्रवाल, भरत महतो, पुष्पा खनाल सम्मानित हुनुभएको छ ।
यसैगरी योग प्रेरकमार्फत प्रेम केसी र उत्कृष्ट योग अभ्यासीमार्फत सबिता शर्मालाई सम्मान प्रदान गरिएको छ ।
