बाँके । भेरी अस्पतालमा फिजियोथेरापी सेवा लिनेहरुको संख्या बढ्दै गएको छ । भेरी अस्पतालमा सुरु भएको फिजियोथेरापी सेवाको कारण थेरापी गराउनेहरुको संख्यामा बृद्धि भएको अस्पतालले जनाएको छ ।
हाडजोर्नी तथा नशाको समस्या भएका बिरामीहरुले थेरापी सेवा लिन सहज भएको नरैनापुर गाउँपालिकाका अध्यक्ष शैयद इस्तियाक अहमद शाहले बताउनु भयो । अध्यक्ष शाहको छोराको मोटरसाइकल दुर्घटनामा परी एसिएल र पिसिएलको शल्यक्रिया पश्चात उक्त सेवा लिन पाएकोमा खुशि व्यक्त गर्नुभयो । उहाँले न्युन शुल्कमा सेवा पाएको र जिल्ला बाहिर गएर सेवा लिनुपर्ने बाध्यता हटेको समेत उल्लेख गर्दै उहाँले नरैनापुर गाउँपालिकामा समेत उक्त सेवा बिस्तारका लागि कार्यपालिकामा छलफल सुरु भएको बताउनु भयो ।
फिजियोथेरापिष्ट बिहानी श्रेष्ठले भन्नुभयो, फिजियोथेरापी सेवा लिन दैनिक बिरामीहरुको संख्या बढीरहेको बताउनुभयो । गत आर्थिक वर्षको ०८१/०८२ को असार मसान्तसम्म ७ हजार ९ सय ५० बिरामीले फिजियोथेरापी सेवा लिएको जानकारी दिनुभयो ।
फिजियोथेरापी सेवा सञ्चालमा आएपछि हाडजोर्नीको उपचारसंगै नसा सम्बन्धी समस्या भएका विरामीले पनि सेवा लिईरहेका छन् । फिजियोथेरापिष्ट श्रेष्ठका अनुसार दैनिक ३० देखि ४० जनाले सेवा लिईरहेका छन् । नशा चुडिएको, खुम्चिएको, च्यापिएको र मासु च्यातिएका बिरामीहरुले समेत फिजियोथेरापी सेवा लिन आउने गरेका छन् ।
श्रेष्ठले विशेष प्राथमिकताका साथ नेपालगञ्ज फिजियोथेरापी क्लिनिक समेत सेवा सञ्चालनमा ल्याएको उल्लेख गर्नु भयो । अस्पतालमा हाडजोर्नी तथा नशा रोगको उपचार तथा अप्रेशन सेवा सुरु भएसँगै फिजियोथेरापी सेवा अत्यावश्यक रहेकाेले नेपालगञ्ज फिजियोथेरापी क्लिनिक संचालनमा ल्याउनु परेको जिकिर गर्नु भयो ।
फिजियोथेरापीबाट हड्डी खिइएको, नसा च्यापिएको, माँसपेशी दुख्ने, झमझमाउने, लुलो हुने, प्यारालाइसिस, जन्मदा नै असाधारण भएका बालबालिका, हातखुट्टा नचल्नेसम्बन्धी रोगको उपचार हुन्छ ।
