काठमाडौं । मतदाता नामावलीमा कात्तिक ३० गतेसम्म नाम दर्ता गर्न सकिने भएको छ। यसअघि स्थगित भएको मतदाता नामावली संकलनलाई आयोगले पुनः सुरु गरेको हो।
निर्वाचन घोषणा भएपछि मतदाता नामावलीमा नाम दर्ता गर्न नसकिने ऐनको बाधालाई फुकाउन सरकारको सिफारिसमा राष्ट्रपति रामचन्द्र पौडेलले बुधबार एक अध्यादेश जारी गरेका थिए।
अध्यादेश जारी भएसँगै आयोगले बिहीबार सूचना जारी गरेर कात्तिक ३० गतेसम्म नाम दर्ता गराउन सकिने बताएको हो।
सूचनाअनुसार, बिदाको दिनबाहेक प्रदेश तथा जिल्ला निर्वाचन कार्यालयहरूमा नाम दर्ता गर्न सकिनेछ।
त्यस्तै अनलाइनबाट आवेदन भरी प्रदेश तथा जिल्ला निर्वाचन कार्यालयहरूमा गएर जैविक विवरण (बायोमेट्रिक) उपलब्ध गराउनुपर्नेछ।
१६ वर्ष उमेर पुगेर नागरिकताको प्रमाणपत्र लिएकाहरूले नाम दर्ता गर्न पाउनेछन्। यद्यपि, मतदान भने फागुन २० गतेभित्र १८ वर्ष उमेर पूरा भएकाले मात्रै गर्न पाउने कार्यवाहक प्रमुख निर्वाचन आयुक्त रामप्रसाद भण्डारीले नेपालखबरलाई जानकारी दिए। प्रतिनिधि सभाको आगामी निर्वाचन फागुन २१ गते हुँदै छ। 
