अछाम । अछामको कमलबजार नगरपालिकामा बालबालिका र युवाहरुको सहभागितामा तिन दिने क्षमता अभिबृद्धी तालिम शुरु भएको छ ।
युनिसेफ नेपालको सहयोगमा बास नेपालद्धारा सञ्चालीत बाल संरक्षण कार्यक्रम अन्तरगत उक्त तालिम शुरु भएको हो ।
तालिमको उद्घाटन सत्रमा बोल्दै कमल बजार नगरपालिकाका उपप्रमुख भुमिशरण ढकाल बजगाईले बालबालिकाहरुको क्षमता अभिबृद्धीले लैंगिक हिंसा न्यूनिकरण हुने बताएकीछिन् । बालबालिकाहरुको अधिकार संरक्षणका लागि नगरपालिकाले विभिन्न कार्यक्रमहरु सञ्चालन गर्दै आएको बताउदै कमल बजार नगरपालिका भित्र बालक्लबहरु सक्रिय रुपमा काम गरिरहेको बताईन् । हाल नगरपालिका स्तरीय बाल क्लब संगै वडा स्तरीय क्लबहरु समेत नयाँ गठन गरिएको बताउदै बाल क्लबमा आबद्ध नयाँ बालवालिकाहरुका लागि बाल अधिकार संरक्षण, लैगिक हिंसा न्यूनीकरण र योजना तर्जुमा प्रक्रिया बिषयक तालिम निकै उपयोगी हुने बताईन् । बालबालिकाको क्षमता अभिबृद्धी तथा बाल संरक्षणको सवालमा युनिसेफ नेपालले गरिरहेको कामको प्रशंसनिय रहेको उनको भनाई थियो । तालिमको उद्घाटन सत्रमा अपेक्षा मन्तब्य राख्दै सहभागिहरुले बाल अधिकार संरक्षण, लैंगिक हिंसा न्यूनीकरण र योजना तर्जुमा प्रक्रियाका बारेमा प्रष्टता आउने बताए ।
बासका कार्यक्रम अधिकृत रबिन्द्र बोहराले सञ्चालन गरेको तालिमको उद्घाटन सत्रमा स्वागत तथा तालिमको उद्धेश्य माथि प्रकाश परियोजना संयोजक हेमराज भट्टले गरेका थिए । उद्घाटन सत्रमा कमल बजार नगरपालिकाका उपप्रमुख भुमिशरण ढकाल बजगाई, नगरपालिकाका निमित्त प्रमुख प्रशासकिय अधिकृत खड्ग बहादुर बिष्ट, सहायक महिला बिकास निरिक्षक डम्बर ढुंगाना, नगरपालिकाका वास फोकल पर्सन पबित्रा भण्डारी लगायतको उपस्थिती रहेको थियो ।
यसैगरी तालिमको पहिलो दिन बाल अधिकार, बाल संरक्षण र बाल बिवाहका विभिन्न बिषयमा प्रशिक्षक पबित्रा भण्डारी र हेमराज भट्टले सहजिकरण गरेका थिए । तालिममा नगर स्तरीय बाल क्लब सञ्जाल र सबै वडाका वडा स्तरीय वाल क्लब संजालका पदाधिकारी र युवाहरु गरी ३२ जना को सहभागिता रहेको छ । तालिम युनिसेफ नेपालको सहयोग, बास नेपालको आयोजना र कमल बजार नगरपालिकाको सहकार्यमा भएको छ ।
