बाँके । लियाना हस्पिटालिटी एण्ड ट्रेनिङ सेन्टरले घरेलु तथा साना उद्योग कार्यालय बाँकेको आयोजनामा ३९० घण्टे जनरल कुक तालिम सुरु गरेको छ। तालिममा स्थानीय युवाहरूलाई व्यावसायिक कुकिङ सीप, स्वच्छता तथा हाइजिन, आधुनिक खाना पकाउने प्रविधि र होटल रेस्टुरेन्टमा आवश्यक पर्ने व्यवहारिक दक्षताहरू सिकाइने बताइएको छ।
उद्घाटन कार्यक्रमका प्रमुख अतिथि नेपालगञ्ज उपमहानगरपालिका–१८ का वडा अध्यक्ष दिपक बर्माले सीपमूलक तालिमले युवालाई आत्मनिर्भर बनाउने भन्दै यस्तो कार्यक्रम निरन्तर सञ्चालन गर्नुपर्ने आवश्यकता औँल्याउनुभयो ।
घरेलु तथा साना उद्योग कार्यालय बाँकेका प्रमुख मोहन घर्तीले युवालाई रोजगारीसँग प्रत्यक्ष जोड्ने तालिमहरूलाई कार्यालयले निरन्तर प्राथमिकतामा राखेको बताउँदै सहभागिता जनाएका युवालाई मेहनत र प्रतिबद्धतासहित सिक्न अनुरोध गर्नुभयो ।
तालिम संचालन गर्न पाएकोमा लियानाका निर्देशक भोदुराम थारुले धन्यवाद व्यक्त गर्दै, गुणस्तरीय सीप, व्यवहारिक तालिम र अनुभवी प्रशिक्षकको माध्यमबाट सहभागीलाई सक्षम कुकका रूपमा तयार पारिने बताउनुभयो ।
