बाँके । बाँकेको नरैनापुर गाउँपालिकालाई पूर्ण खोप सुनिश्चितता तथा दिगोपना घोषणा गरिएको छ । पालिकाका सबै ६ वटै वडा पूर्ण खोप सुनिश्चितता तथा दिगोपना घोषणा गरिएसँगै पालिकालाई पनि आज दिगोपना घोषणा गरिएको हो ।
नरैनापुर गाउँपालिकामा १ हजार ५२ जना बालबालिका १६ महिनादेखि २३ महिना उमेर समूहका छन् । छुटेका १५५ जना बालबालिकालाई पनि सबै प्रकारका खोप लगाइएको छ । उनीहरू सबैले पाउनुपर्ने खोप पाइसकेपछि नरैनापुर गाउँपालिका वडा नं ६ का अध्यक्ष एवं पालिकाका कार्यवाहक अध्यक्ष प्रेम मौर्यले आज एक कार्यक्रमका बीच पूर्ण खोप सुनिश्चितता तथा दिगोपना घोषणा गर्नुभएको हो ।
जिल्ला समन्वय समिति बाँकेका प्रमुख तथा खोप समन्वय समितिका संयोजक ज्ञानेन्द्र चौधरीले उत्साह र उमङ्गका साथ काम गरेकोले पूर्ण खोप बनाउन सकिएको र यसलाई निरन्तरता पाउनु ठुलो विषय भएकोले आगामी दिनमा पनि अभियानकै रूपमा सञ्चालन गर्न आवश्यक रहेको बताउनुभयो ।
कार्यक्रममा पालिकालाई पूर्ण खोप सुनिश्चितता प्रमाणपत्र समन्वय प्रमुख चौधरीले नरैनापुर गाउँपालिका वडा नं ६ का अध्यक्ष एवं पालिकाका कार्यवाहक अध्यक्ष मौर्यलाई हस्तान्तरण गर्नु भएको थियो । सो अवसरमा पालिकाका कार्यवाहक अध्यक्ष मौर्यले खोप सुनिश्चितता घोषण गर्न सहयोग गर्ने कर्मचारीलाई धन्यवाद दिँदै खोपले बालबालिकामा विभिन्न रोगबाट बच्ने प्रतिरोधात्मक क्षमता बढ्ने भएकाले खोपबाट बालबालिकालाई वञ्चित गराउन नहुने बताउनुभयो ।
घोषणा कार्यक्रममा जिल्ला खोप समन्वय समिति संयोजक समेत रहनुभएका जिल्ला समन्वय समिति प्रमुख ज्ञानेन्द्र कुमार चौधरी, स्वास्थ्य संयोजक नगेन्द्र कुमार शाह लगायत सरोकारवालाको उपस्थिति थियो ।
