बाँके । बाँकेको जानकी गाउँपालिकामा जनप्रतिनिधि र कर्मचारीहरूको क्षमता अभिवृद्धि गर्ने उद्देश्यले एक दिने अभिमुखीकरण तथा क्षमता विकास तालिम सम्पन्न गरिएको छ ।
गाउँपालिकाको आयोजना तथा जिल्ला प्रशासन कार्यालय बाँकेको सहजीकरणमा सञ्चालन गरिएको तालिममा जनप्रतिनिधि, वडा सचिव, विषयगत शाखा प्रमुखसहित ४० जनाको सहभागिता रहेको थियो ।
तालिम उद्घाटन गर्दै गाउँपालिकाका प्रमुख प्रशासकिया अधिकृत परशुराम उपाध्यायले जनप्रतिनिधि र कर्मचारीमा अध्ययनको कमी हुँदा काम कारबाहीमा समस्या देखिने गरेको बताउनुभयो ।
“आफ्नो जिम्मेवारी र कार्यक्षेत्रबारे अध्ययन नगर्दा धेरै समस्या आउने गरेका छन्,” उहाँले भन्नुभयो, “यस्ता तालिमले जनप्रतिनिधि र कर्मचारीलाई काम, कर्तव्य र अधिकारबारे स्पष्ट बनाउँदै सेवा प्रवाहलाई प्रभावकारी बनाउन मद्दत पु¥याउँछ ।”
उहाँले तालिमबाट सिकेका कुरा व्यवहारमा लागू गर्न आग्रह गर्दै जनप्रतिनिधि र कर्मचारीले भ्रष्टाचारबाट टाढा रहनुपर्नेमा जोड दिनुभयो ।
अधिकृत उपाध्यायले भन्नुभयो,“गाउँपालिकामा गर्न नसकिने कुनै काम छैन । जाँगर र इमानदारिता भए विकास सम्भव छ ।,”
तालिममा बाँकेका सहायक प्रमुख जिल्ला अधिकारी पूर्ण प्रसाद खत्रीले स्थानीय तहका काम, कर्तव्य, अधिकार तथा प्रशासनिक प्रक्रिया सम्बन्धी प्रशिक्षण दिनुभएको थियो ।
कार्यक्रममा व्यक्तिगत घटना दर्ता, जन्म, मृत्यु, विवाह, बसाइँसराइ, सम्बन्ध विच्छेद, सामाजिक सुरक्षा भत्ता, बैंकिङ प्रणाली, विपद् पूर्वतयारी, योजना छनोट तथा सञ्चालन लगायतका विषयमा प्रशिक्षण प्रदान गरिएको थियो ।
जिन्सी शाखा प्रमुख राजु यादवले संचालन गरेको कार्यक्रमको समापनमा बोल्दै गाँउपालिकाका प्रवक्ता एंव वडा नं. ५ का अध्यक्ष टिकानाथ यादवले जनप्रतिनिधि र कर्मचारीलाई विद्यमान ऐन, कानुन र नीति–नियमबारे जानकारी गराई उत्तरदायी तथा प्रभावकारी बनाउने उद्देश्यले तालिम आयोजना गरिएको बताउनु भयो ।
वडा नं. १ का अध्यक्ष मोहम्मद रजा राईको अध्यक्षतामा सम्पन्न कार्यक्रममा, गाउँपालिका प्रवक्ता टिकानाथ यादव, वडा नम्बर २ का अध्यक्ष चन्द्रिका प्रसाद गुप्ता, सामाजिक विकास समिति संयोजक राम अचल धोबी, वातावरण तथा विपद् समिति संयोजक राजेन्द्र सिंह,सूचना प्रविधि अधिकृत विकास जिसी,प्रशासन शाखा प्रमुख गोपी चौलागाई, वडा नं. ६ का सदस्य अजमत अलि, कार्यपालिका सदस्य तारावती खटिक, कान्ती काँदु, निर्माला हरिजन,लगायतको उपस्थिती रहेको थियो ।
तालिम समापन गर्दै अध्यक्ष राईले सहभागीहरू अब आफ्नो भूमिका, जिम्मेवारी र अधिकारबारे थप स्पष्ट भएको विश्वास व्यक्त गर्दै जनसेवालाई प्राथमिकतामा राखेर काम गर्न आग्रह गर्नुभयो ।
