काठमाडौं । लैनचौरबाट एक चिनियाँ नागरिकलाई अपहरण गरेको आरोपमा प्रहरीले ६ जना पक्राउ गरिएको छ । बुधबार राति चिनियाँलाई लैनचौरबाट अपहरण गरेर गोंगबुमा बन्धक बनाएर राखेको आरोपमा उनीहरुलाई पक्राउ गरिएको हो । पक्राउ पर्नेहरु सबै नेपाली रहेका छन् ।
बन्धक बनाइएका चिनियाँको उद्दार गर्नुका साथै संलग्न भएको आरोपमा ६ जनालाई पक्राउ गरिएको जिल्ला प्रहरी परिसर काठमाडौंले जनाएको छ ।
उनीहरुले तीन चिनियाँ नागरिकबाट ८ लाख रुपैयाँ र २७ थान मोबाइलसमेत लुटेको प्रहरीले दाबी गरेको छ । अपहरणमा परेका चिनियाँसँग एक करोड फिरौती माग गरिएको बुझिएको प्रहरीले जनाएको छ ।
पक्राउ परेकाहरुको नाम सार्वजनिक गरिएको छैन । अपहरणमा संलग्न भएका अन्य केही व्यक्ति फरार रहेकाले उनीहरूको खोजी भइरहेको प्रहरीले जनाएको छ ।
