बुटवल । नेपाल विद्युत प्राधिकरण बुटवल ग्रिड महाशाखाले बुटवल–मोतीपुर १३२ केभी प्रसारण लाइन मर्मत कार्यका कारण तीन दिनसम्म विद्युत् आपूर्तिमा असर पर्न सक्ने जनाएको छ ।
महाशाखाले जारी गरेको सूचनामा बुटवल सबस्टेसन खण्ड–४ अन्तर्गत रहेको Lattice Tower लाई Monopole Tower मा प्रतिस्थापन गर्ने काम ठेकेदार कम्पनीमार्फत हुने उल्लेख गरिएको छ । सो क्रममा २०८२ कार्तिक ८ देखि १४ गतेसम्म Monopole Erection, Conductor Stringing र Tower Dismantling कार्य हुने भएकाले दुबै सर्किट चौबिसै घण्टा लाइन अवरुद्ध हुने जनाइएको छ ।
लाइन अवरुद्ध हुँदा प्रभावित क्षेत्रका उपभोक्ताले अस्थायी रूपमा बत्ती झिमझिम वा विद्युत आपूर्ति पूर्णरूपमा अवरुद्ध हुने सम्भावना रहेको प्राधिकरणले जनाएको छ ।
महाशाखाका प्रमुख इ. अनिल बन्जाडेले “काम सकेपछि प्रसारण लाइन तुरुन्त सञ्चालनमा ल्याइनेछ,” भन्दै असुविधाका लागि उपभोक्तामाझ क्षमायाचनासहित आवश्यक तयारी गर्न आग्रह गरेका छन् । यस्तै नेपालगन्ज वितरण केन्द्रले पनि उपभोक्ताहरु संग क्षमायाचना मागेको छ ।
