बाँके । डिभिजन वन कार्यालय बाँकेको आयोजना र नरैनापुर सब–डिभिजन वन कार्यालयको समन्वयमा नरैनापुर गाउँपालिका–२ स्थित लक्ष्मणपुर प्राथमिक स्वास्थ्य केन्द्रको हलमा एक दिने वन अभिमुखीकरण कार्यक्रम सम्पन्न भएको छ ।
कार्यक्रमको उद्घाटन गर्दै नरैनापुर गाउँपालिकाका अध्यक्ष इस्तियाक अहमद शाहले वन संरक्षणलाई स्थानीय तहको प्राथमिकतासँग जोड्दै दिगो उपयोग र सामुदायिक सहभागिता वन सुरक्षाको आधारस्तम्भ भएको उल्लेख गर्नुभयो ।
मुख्य सत्रमा सिनियर डिभिजन वन अधिकृत शंकरप्रसाद गुप्ताले वन संवर्द्धन प्रणालीमा आधारित वन व्यवस्थापन बारे विस्तृत प्रस्तुतीकरण गर्दै यसबाट वनको हैसियत मजबुत हुने, पैदावार आपूर्ति सहज र निरन्तर बन्ने, स्थानीय रोजगारी बढ्ने तथा उपभोक्ता समूहहरूको आम्दानीमा उल्लेख्य वृद्धि हुने तथ्य राख्नुभयो ।
हाल स्वीकृत नरैनापुर गाउँपालिका वन कार्य योजना अनुसार अघि बढ्ने कार्यक्रमहरूको विवरण प्रस्तुत गर्दै अधिकृत गुप्ताले वन अतिक्रमण नियन्त्रण, चोरी–निकासी रोकथाम तथा समूहको सक्रियता अपरिहार्य रहेकोमा विशेष जोड दिनुभयो ।
कार्यक्रममा सशस्त्र प्रहरी बलका डिएसपी विक्रम मणि अधिकारीले चोरी–निकासी, सितलाहार तथा अन्य अवैध गतिविधिबाट बच्ने तरिका, निगरानी प्रणाली र सुरक्षा उपायबारे व्यावहारिक तालिम प्रदान गर्नुभयो ।
स्थानीय जनप्रतिनिधि, उपभोक्ता समूहका सदस्यलगायत ७२ जना सहभागी उपस्थित रहेको कार्यक्रमको सञ्चालन तथा समापन सब–डिभिजन वन कार्यालय नरैनापुरका प्रमुख पुष्कर विश्वकर्माले गर्नुभयो ।
सहभागीहरूले दिगो वन व्यवस्थापन, सामुदायिक भूमिकाको सुदृढीकरण र वन सुरक्षा सम्बन्धी जागरूकता विस्तारमा कार्यक्रम अत्यन्त उपयोगी रहेको प्रतिक्रिया दिएका छन् ।
