काठमाडौं । नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्तारुढ गठबन्धनमा महानगरपालिकाको भागबण्डाबारे सहमति भएको खुलासा गरेका छन् । पार्टी कार्यालय पेरिसडाँडामा आयोजित पत्रकार सम्मेलनमा सत्ता गठबन्धनमा ६ महानगरको भागबण्डा मिलेको उनले बताए ।
उनका अनुसार पाँच दलीय गठबन्धनका मुख्य चार दललाई भाग पुग्ने गरी महानगर विभाजन गरिन लागिएको छ । तीन महानगर नेपाली कांग्रेस र बाँकीलाई एक-एक सिट दिने सहमति भएको उनको भनाइ छ ।
उनले भने, ‘६ महानगरमा कांग्रेसलाई ३, माओवादी, एकीकृत समाजवादी र जसपालाई एक-एक सिट दिने लगभग सहमति भएको छ। आजै बेलुकी बैठक बसेर महानगर र उपमहागर गरी १७ पालिकाको टुंगो लगाउँछौं ।’
प्रचण्डले यही लाइनमा आफूहरु सहमति नजिक पुगेको पनि दाबी गरे । उनले भने, ‘करिब करिब हामी यहि लाइनमा निष्कर्षनजिक छौं । उपमहानगरपालिका पनि त्यही मोडलबाट टुंग्याउने तयारी छ ।’
काठमाडौं, ललितपुर र विराटनगरमा कांग्रेस, भरतपुरमा माओवादी, पोखरामा एकीकृत समाजवादी र वीरगञ्जमा जनता समाजवादीले लिने करिब करिब सहमति भएको बताइएको छ ।
