एजेन्सी । रुसले कच्चा पेट्रोलियम पदार्थको मूल्य प्रतिब्यारेल तीन सय अमेरिकी डलरसम्म पुग्ने चेतावनी दिएको छ ।
रुस र युक्रेनबीच चलिरहेको युद्धका कारण अन्तर्राष्ट्रिय बजारमा अमेरिकी डलर, सुन र पेट्रोलियम पदार्थको मूल्य बढ्दोक्रममा छ । रुसमाथि पश्चिमा देशहरूले विभिन्न प्रतिबन्ध लगाउन थालेका छन् । पश्चिमाहरूले प्रतिबन्ध लगाइरहने हो भने कडा कदम चाल्न बाध्य हुने चेतावनी दिँदै रुसले कच्चा तेलको मूल्य प्रतिब्यारेल तीन सय डलर पुग्ने बताएको हो । हाल कच्चा तेलको मूल्य प्रतिब्यारेल एक सय ३९ अमेरिकी डलर पुगेको छ ।
यसैबीच, युद्ध सुरु भएयता ज्यान जोगाउन युक्रेन छोड्ने शरणार्थीको संख्या २० लाख नाघिसकेको संयुक्त राष्ट्र संघलाई उद्धृत गर्दै बीबीसीले जनाएको छ । उक्त संख्यामध्ये पोल्यान्डमा मात्रै १२ लाख शरणार्थी पुगेका छन् । रुसले आक्रमण जारी राखेको क्षेत्रमा निश्चित समय युद्धविराम गरेर सर्वसाधारणलाई बाहिर जान सुरक्षित मार्ग दिन थालेको बीबीसीले उल्लेख गरेको छ ।
