बाँके । योग समिति नेपालले नेपालगञ्ज उपमहानगरपालिका परिसरमा एक कार्यक्रमको आयोजना गरि ९ औँ योग दिवस मनाइएको छ ।
नेपालगन्जका मेयर प्रशान्त बिष्ट र नरैनापुर गाउँपालिकाका अध्यक्ष शैयद इस्तियाक अहमद शाहको बिशेष उपस्थितीमा योग समिति नेपालले योग दिवस मनाएको योग गुरु गिरिराज भट्टराईले बताए । 
नेपालगञ्जका मेयर बिष्टले आधुनिक समाजमा योगको महत्व बढ्दै गएको बताए। सुस्वास्थ्य र स्वस्थ जीवनशैलीका लागि योग अतिआवश्यक रहेको बिष्टको भनाई थियो।
नरैनापुर गाउँपालिकाका अध्यक्ष इस्तियाक अहमद शाहले सबै प्रकारको रोगबाट मुक्ति मिल्ने योगाभ्यास गाउँगाउँमा गर्न जरुरी रहेको बताए । उनले योगले शारीरिक तथा मानसिक रुपमा पनि नागरिकलाई स्वस्थ बनाउने भएकाले स्थानीय सरकारले यसलाई जोड दिएर राष्ट्रिय दिवसको रुपमा मनाउने गरेको पनि जानकारी दिए । उहाँले नेपालगञ्ज उपमहानगरपालिका र नरैनापुर गाउँपालिकाको सहयोगमा राष्ट्रिय स्तरको योग सम्मेलन गर्नका लागि तयारी गर्न योग समिति नेपाललाई आग्रह गरेका थिए । 
शारीरिक तन्दुरुस्तीका लागि पनि विश्वभर योगको आकर्षण बढदै गएको छ । यसैकारण संयुक्त राष्ट्र संघको आह्वानमा विश्वमा अन्तराष्ट्रिय योग दिवसनै मनाउन सुरु गरिएको छ ।
कार्यक्रममा सहभागीहरूलाई योग गुरु भट्टराईले योगको प्रशिक्षण दिनुका साथै यसको महत्त्व बारे जानकारी गराएका थिए । कार्यक्रममा प्रमुख प्रशासकीय अधिकृत मणिराम खराल,नरैनापुरका प्रेस बिज्ञ एवं मानव अधिकारकर्मी आलम खान, पत्रकार रुद्र सुवेदी, अधिवक्ता निश्चित तिवारी लगायतको सहभागिता रहेको थियो । भने कार्यक्रमको सन्चालन झबि शर्माले गरेका थिए ।
