बाँके । बाँकेको वडा नं ४ मा रहेको बाबा मस्तान शाहको उर्स आज सम्पन्न भएको छ । नेपालगंज उप महापालिका वडा नम्बर ४ घोसीटोलमा रहेको बाबा मस्तान शाहको उर्स मंगलबार देखि सुरु भएको थियो । उर्समा गागर, चादर चढाउने कार्य भएको थियो ।
धार्मिक तथा सांस्कृतिरुपमा यो उर्स महत्वपूर्ण रहेको जानकारहरु बताउँछन् । मुस्लिम तथा हिन्दुहरुबीचको साँझा मेलाले धार्मिक तथा सामाजिक सदभाव कायम गर्न ठूलो बल पुर्याएको उर्स संचालक सद्दन राईले बताउनुभयो । आस्थाको धरोहरका रुपमा रहेको यो उर्समा पुग्नेहरुले आफुले मागेको चाहना पूरा हुने विश्वास गरिन्छ ।
त्यसैकारण बाँकेका विभिन्न ठाउँबाट उर्समा बाबा मस्तान शाहको दर्शन गर्न दर्शालुहरु पुग्ने गरेका छन् । उर्सलाई भव्य रुपमा सफल बनाउनका लागि भारतका विभिन्न स्थानबाट मस्तान लगायत कौवालहरु आएका थिए ।
सांस्कृतिक, धार्मिक तथा सामाजिक सदभाव कायम राख्नका लागि यो उर्सको महत्वपूर्ण योगदान रहेको स्थानीयहरु बताउँछन् ।
