बाँके । बहिरा युवालाई सीप, रोजगार र उद्यमशीलतामा उकास्ने उद्देश्यसहित १५ दिने ‘छ्वाली आर्ट’ हस्तकला तालिम सम्पन्न गरिएको छ। बाँके र बर्दियाका १० जना बहिरा युवाको सहभागितामा कृषि व्यवसाय प्रवर्द्धन तथा तालिम केन्द्र, खजुरा बाँकेमा आयोजित तालिमले सहभागीहरूको कौशल विकासमा नयाँ ऊर्जा भरेको छ।
राष्ट्रिय बहिरा महासङ्घ नेपालको आयोजना तथा नेपाल पर्यटन बोर्ड र संयुक्त राष्ट्रसङ्घीय विकास कार्यक्रम (UNDP) सँगको सहकार्यमा सम्पन्न तालिमले युवालाई आत्मनिर्भर जीवनतर्फ डोर्याउने अपेक्षा गरिएको छ।
गहुँबाली भित्र्याएपछि गाईवस्तुका लागि जोहो गरेर राखिने छ्वाली बाट तयार गरिने आकर्षक कलाकृतिलाई ‘छ्वाली आर्ट’ भनिन्छ। देश–विदेशमा माग बढ्दै गएको यस हस्तकलाले कृषिमा खेर गइरहेका सामग्रीको सदुपयोगमार्फत रोजगारी सिर्जना गर्ने सम्भावना अत्यधिक छ।
समापन कार्यक्रममा प्रमुख अतिथि तथा कृषि व्यवसाय प्रवर्द्धन तथा तालिम केन्द्रका प्रमुख श्रीधर ज्ञवालीले बहिरा युवाले सिकेका सीपलाई व्यवहारमा उतारेर आयआर्जनमा रूपान्तरण गर्न आग्रह गर्दै यस तालिमले आत्मनिर्भर जीवनदिशा तय गर्न सहयोग पुग्ने विश्वास व्यक्त गरे ।
राष्ट्रिय बहिरा महासङ्घ नेपालका अध्यक्ष सन्तोष केसीका अनुसार कृषिमा खेर जाने सामग्रीको सदुपयोगसहित बहिरा युवाको आयआर्जन बढाउने उद्देश्यले तालिम सञ्चालन गरिएको हो। छ्वाली आर्टको विदेशमा पनि उच्च माग रहेको बताउँदै केसीले बाँके र बर्दिया राष्ट्रिय निकुञ्जको पर्यटन प्रवर्द्धनमा सहायक हुने लक्ष्यसहित तालिम अघि बढाइएको जानकारी दिए।
महासङ्घले सातै प्रदेशमा यस प्रकारका तालिम सञ्चालन गर्ने योजना अघि सारेको तथा काठमाडौंमा ट्रेकिङ गाइड र बरिष्टा (कफी बनाउने) तालिम पनि चलिरहेको केसीले बताए।
यो तालिमले बहिरा युवामा आत्मविश्वास, अवसर र नयाँ सम्भावनाको ढोका खोलेको आयोजकहरूको भनाइ छ।
तालिममा प्रमुख प्रशिक्षक गगन तारा हस्तकलाका प्रमुख सिताराम गोसाईं र सहायक प्रशिक्षक विष्णुकेशरी देशमरुले तालिम प्रदान गर्नुभएको थियो । त्यसक्रममा दोभाषेद्वय प्रकाश महर्जन र विश्वास अधिकारीले सहजीकरण गर्नुभएको थियो ।
