नेपालगन्ज । बाँके क्षेत्र नं. २ मा प्रतिनिधि सभा निर्वाचनको दृश्य तीव्र रूपमा फेरिँदै गएको छ। पूर्व प्रधानमन्त्रीका भतिजो उम्मेदवारको प्रभाव कमजोर बन्दै जाँदा जनताको भरोसा भने दिपेन्द्र बिष्टतर्फ स्पष्ट रूपमा केन्द्रित हुँदै गएको देखिन्छ । गाउँ–गाउँ, टोल–टोलमा बिष्टको समर्थन बढ्दै जाँदा बाँके २ को चुनावी माहोल नै परिवर्तनको दिशातर्फ मोडिएको छ।
डुडुवा गाउँपालिकाको विकासमा विशेष भूमिका खेल्ने प्रतिबद्धतासहित चुनावी मैदानमा उत्रिनु भएका बिष्टले शिक्षा, स्वास्थ्य, रोजगारी र जेन–जीका मुद्दालाई कागजमा होइन, व्यवहारमा कार्यान्वयन गर्ने स्पष्ट दृष्टिकोण प्रस्तुत गरेपछि मतदाताहरू उत्साहित बनेका छन् । “अब भाषण होइन, काम गर्ने नेतृत्व चाहिन्छ”, मतदाताहरूको यही भावना अहिले बिष्टको अभियानको मूल स्वर बनेको छ ।
स्थानीय बासिन्दा दिलिप खटिकका अनुसार बिष्ट केवल उम्मेदवार मात्र होइन, बाँके २ का लागि विकासको भरोसायोग्य विकल्पका रूपमा स्थापित हुँदै गएका छन् । डुडुवादेखि अन्य पालिकासम्म सडक, शिक्षा, स्वास्थ्य सेवा र रोजगारी सिर्जनामा ठोस पहल गर्ने प्रतिबद्धताले जनताको विश्वास जितेको उनको भनाइ छ ।
विशेषगरी जेन–जीका मुद्दालाई प्राथमिकतामा राख्दै डिजिटल सीप, उद्यमशीलता र रोजगारीसँग जोड्ने बिष्टको योजनाले युवा पुस्ता आशावादी बनेको छ । युवाहरू भन्छन्, “हाम्रो कुरा सुन्ने मात्रै होइन, कार्यान्वयन गर्ने नेता बिष्ट नै देखिन्छ ।”
डुडुवा गाउँपालिकाका स्थानीय राम नरेश चौधरीले भने, “गाउँको सडक–गल्ली र गाउँको नामसम्म नचिनेका केही पूर्व नेता र उनीहरूका परिवारका सदस्यहरू आज चिल्लो गाडी लिएर आफ्नो स्वार्थ पूरा गर्न गाउँ पस्न थालेका छन् । जनतालाई झुटो प्रलोभन देखाएर मत लिने यस्ता व्यक्तिमाथि अब विश्वास गर्न हुँदैन ।” उनले नवयुवक र जनताको हितमा काम गर्ने नेता दिपेन्द्र बिष्टलाई मतदान गर्न सबैसँग अपिल गरे ।
बाँके–२ ले अहिले स्पष्ट सन्देश दिइरहेको छ, राजनीतिमा अब नाम र वंश होइन, काम, दृष्टिकोण र जनतासँगको इमानदार सम्बन्ध निर्णायक बन्दै गएको छ ।
पूर्व प्रधानमन्त्रीको भतिजोको प्रभाव कमजोर बन्दै जाँदा आम मतदाताको साथ बिष्टलाई मिल्नु परिवर्तनको स्पष्ट संकेत हो ।
बाँके क्षेत्र नं. २ मा अहिले एउटा नयाँ धार स्थापित हुँदैछ,जहाँ शक्ति होइन, जनताको भरोसा बोलिरहेको छ; जहाँ पुराना अनुहार होइन, नयाँ आशा अगाडि बढिरहेको छ; र जहाँ दिपेन्द्र बिष्ट जितको बलियो आधार बनाउँदै दृढतापूर्वक अघि बढिरहनु भएको छ।
