दाङ । लुम्बिनी प्रदेश सरकारले आइतबार मन्त्रिपरिषद् विस्तार गर्ने तयारी गरेको छ । गृहमन्त्री एवं सरकारका प्रवक्ता सन्तोषकुमार पाण्डेयका अनुसार कांग्रेसबाट प्युठानका सांसद सरोज थापा र माओवादीबाट बाँकेकी सांसद कृष्णा केसीलाई मन्त्री बनाउने टुंगो लागेको छ ।
मुख्यमन्त्री डिल्लीबहादुर चौधरीले शनिबार कांग्रेसबाट थापालाई मन्त्री बनाउने टुंगो लगाएका हुन् । थापा र केसीलाई आइतबार बिहान शपथग्रहण गराइने कार्यक्रम तय भएको पाण्डेयको बताए । उनका अनुसार केसीलाई खानेपानी, ग्रामीण तथा सहरी विकास मन्त्रालय र थापालाई पर्यटन तथा यातायात व्यवस्था मन्त्रालयको जिम्मेवारी दिइने भएको छ ।
शुक्रबार मन्त्रिपरिषद् विस्तार गर्ने भनिएपनि कांग्रेसभित्र कुरा नमिलेपछि रोकिएको थियो । मुख्यमन्त्री चौधरीले शनिबार थापाको नामअघि सारेका थिए । थापा कांग्रेस संस्थापन पक्षका सांसद हुन् । कांग्रेस संस्थापनइत्तर पक्षले वीरबहादुर राना र विश्वप्रम पाठकलाई मन्त्री बनाउन दबाब दिएपछि मन्त्रिपरिषद् विस्तार रोकिएको थियो ।
