बाँके । नेपालगंज उपमहानगरपालिका वडा नम्बर ५ का नव निर्वाचित वडा अध्यक्ष सराफत हुसेन शेष ले पदभार ग्रहण गरेको एक साता नपुग्दै उनले जनपक्षीय निर्णय गरेका छन् ।
वडा अध्यक्ष सराफतले वडावासीहरुको आवश्यकतालाई ध्यानमा राख्दै नागरिकता फारम निःशुल्क बितरण गर्ने घोषणा गरेका हुन् ।
बिहिबार युथ टुडे संवाददाता संग कुरा गर्दै वडा अध्यक्ष सराफतले आफना वडाबासीहरुलाई समस्या नहोस भन्नका लागि आफनो व्यक्तिगत तर्फबाट उक्त फारम वितरण गर्ने बताए । उनले भने “वडाबाट प्रदान हुने सेवा सहज र सरल बनाएर अगाडि बढने छु ।” वडामा जनताको काममा ढिला सुस्ती गर्ने अधिकार कसैलाई नभएकोले सहज रुपमा काम गर्न कर्मचारीहरुलाई निर्देशन दिएको बताउदै कार्यालय समयमा नआउने कर्मचारीलाई कानुनी कारवाही गर्ने वडा अध्यक्ष सराफतको भनाई थियो ।
वडा अध्यक्ष सराफतले सबै वडावासी मतदातामा धन्यवाद दिँदै आफूले वडाबाट गर्ने काममा कसै प्रति विभेद नगरी सबैलाई समान रुपमा सेवा प्रवाह गर्ने बताए । उनले वडाको विकासका लागि सबैको सल्लाह अनुसार सबैसँग हातेमालो गरि आफू लाग्ने प्रतिवद्धता समेत व्यक्त गरे ।
उनले आफू तलबका लागि नभई जनसेवाका लागि वडा अध्यक्ष बनेको दाबी गरे । आफ्नो कार्यकालभर इमान्दारिताका साथ काम गर्ने पनि उनले बताए । उनी जनता समाजबादी पार्टी नेपालबाट वडा अध्यक्षमा विजय भएका हुन् ।
