काठमाडौँ । सञ्चार तथा सूचना प्रविधि मन्त्री पृथ्वी सुब्बा गुरुङले नेपाल–जापानबिचको प्राविधिक साझेदारीलाई सहज बनाउने प्रतिबद्धता व्यक्त गर्नुभएको छ ।
नेपाल र जापानको प्राविधिक साझेदारीलाई सहज बनाउन आयोजना गरिएको जापान–नेपाल आइटी फोरम २०२५ लाई आज काठमाडौँमा सम्बोधन गर्नुहुँदै मन्त्री गुरुङले नेपाल सरकारले सञ्चार मन्त्रालयमार्फत डिजिटल र आइसिटी क्षेत्रमा पारस्परिक वृद्धिलाई प्रवर्धन गर्न जापान सरकारसँग रणनीतिक सहकार्यलाई सक्रिय रूपमा बढवा दिइरहेको बताउनुभयो ।
मन्त्री गुरुङले डिजिटल रूपान्तरण र आर्थिक आधुनिकीकरणको लागि नेपाल सरकारले क्षेत्रीय र विश्वव्यापी आवश्यकता पूरा गर्न हरित डेटा पूर्वाधार निर्माण गर्न जापानी लगानी आवश्यक भएकोमा जोड दिनुभयो ।
मन्त्री गुरुङले राष्ट्रिय डिजिटल दृष्टिकोणलाई साकार पार्न जापानको प्राविधिक र वित्तीय सहकार्य महत्त्वपूर्ण हुने भन्दै उहाँले नेपालले जिटुजी ढाँचा अन्तर्गत आफ्नै उपग्रह प्रक्षेपण गर्न जापानको प्राविधिक सहयोग खोजिरहेको बताउनुभयो ।
उहाँले जापानी लगानीकर्ता, अनुसन्धानकर्ता र प्राविधिक उद्यमीलाई नेपालमा सूचना प्रविधि नवप्रवर्तन र सहकार्यको लागि आफ्नो मन पर्ने गन्तव्य बनाउनसमेत आग्रह पनि गर्नुभयो ।
