काठमाडौं । संस्कृति, पर्यटन तथा नागरिक उड्डयनमन्त्री सुदन किराँतीले राष्ट्रवादको परिभाषा फेर्नुपर्ने बताएका छन्।
नेपाल पत्रकार महासंघ ललितपुर शाखाले प्रकाशन गरेको ‘ललितपुर पत्रकारिता’ विमोचनका क्रममा आज (शनिबार) मन्त्री किराँतीले देशलाई कंगाल बनाउने सामन्ती राष्ट्रवादको परिभाषा फेर्नुपर्ने बेला आएको बताएका हुन् ।
‘हामी सामन्ती राष्ट्रवादमा छौँ। देशलाई कंगाल बनाउने राष्ट्रवाद’, उनले भने, ‘नेपालीलाई विदेश पठाएर लास ल्याउने राष्ट्रवादको अन्त्य हुनुपर्छ।’ विकास निर्माणको स्पष्ट खाका नहुँदा पर्यटन विकास नभएको उनले बताए ।
मन्त्री किराँतीले जानीजानी खाएर देश र जनतालाई धोका नदिने पनि बताएका छन्। ‘म नियतले देश र जनतालाई धोका दिन्नँ’, किराँतीले भने, ‘घुस खाएर गल्ती गरेर धोका दिन्नँ।’
उनले निजी क्षेत्रलाइ हेलिप्याड बनाउन सैद्धान्तिक सहमति दिएको स्वीकार गरेका छन् । नेपालको संविधानअनुसार वडा, पालिका, सीडीओ र गृह मन्त्रालयको स्वीकृत पत्रकै आधारमा आफूले मन्त्रालयबाट सहमति दिएको उनको भनाइ छ।
