बाँके । कार्तिक पूर्णिमाको पावन अवसरमा बाँकेको जानकी गाउँपालिका–२ जोगा गाउँमा सुरु भएको तीन दिने “पूर्णिमा नहान मेला” उत्साह र भव्यताका साथ आरम्भ भएको छ । मेलाको उद्घाटन जानकी गाउँपालिका अध्यक्ष छब्बन खान र लुम्बिनी प्रदेश सभा सदस्य बादसाह कुर्मीले संयुक्त रूपमा गर्नुभयो ।
उद्घाटन समारोहमा बोल्दै प्रदेश सभा सदस्य कुर्मीले भन्नुभयो,“पूर्णिमा नहान मेला हाम्रो धार्मिक, सांस्कृतिक र सामाजिक पहिचानको प्रतीक हो । यस्तो मेलाले गाउँमा ऐक्यबद्धता र पर्यटन प्रवर्द्धनमा समेत टेवा पुर्याउँछ ।”
त्यसैगरी गाउँपालिका अध्यक्ष खानले भन्नुभयो,“यो मेला केवल धार्मिक उत्सव मात्र होइन, यसले स्थानीय आर्थिक गतिविधि र सामाजिक सद्भाव बढाउने अवसर पनि प्रदान गर्छ । गाउँपालिकाले मेलाको व्यवस्थापन र सुरक्षामा विशेष ध्यान दिएको छ ।”
गाउँपालिकाका प्रमुख प्रशासकीय अधिकृत परशुराम उपाध्यायले गाउँपालिकाको तर्फबाट मेलाको सफलताको शुभकामना व्यक्त गर्दै भन्नुभयो,“मेलालाई व्यवस्थित र सहज बनाउन गाउँपालिकाले स्थानीय निकाय, सुरक्षाकर्मी र स्वयंसेवकहरूसँग सहकार्य गरेको छ ।”
जानकी गाउँपालिका वडा नं ५ का अध्यक्ष तथा प्रवक्ता टिकानाथ यादवका अनुसार मेलामा नेपालका विभिन्न जिल्ला र भारतका सीमावर्ती क्षेत्रहरूबाट हजारौं श्रद्धालुहरू आउने गर्छन् । उहाँले बताउनुभयो,“पूर्णिमाको बिहान भक्तजनहरूले राप्ती नदीमा पवित्र स्नान गरी पूजा–अर्चना र धार्मिक अनुष्ठानमा सहभागी हुने परम्परा रही आएको छ ।”
मेलामा सांस्कृतिक कार्यक्रम, भजन–कीर्तन, धार्मिक प्रवचन, मेलामा आउने व्यापारिक स्टलहरू र स्थानीय उत्पादनको प्रदर्शन पनि गरिएको छ । जोगा गाउँ आज बिहानदेखि नै श्रद्धा र उत्साहले भरिएको देखिन्छ, जसले गाउँमा पर्वमय वातावरण सिर्जना गरेको छ ।
कार्तिक पूर्णिमाको धार्मिक ऊर्जा, स्थानीय उत्साह र सामाजिक एकतालाई जोड्ने यो तीन दिने नहान मेला अहिले जानकी गाउँपालिकाको सांस्कृतिक पहिचान र पर्यटन आकर्षणका रूपमा स्थापित हुँदै गएको छ ।
