बाँके । बाँकेको हुलाकी राजमार्ग अन्तर्गत राप्ती नदीस्थित सडक खण्ड जिर्ण बनेको भन्दै सडकलाई तत्काल व्यवस्थित गर्न सम्बन्धित पक्षलाई नरैनापुर गाँउपालिकाका अध्यक्ष शैयद इस्तियाक अहमद शाहले ध्यानाकर्षण गराउनु भएको छ । 
दशैँ नजिकिँदै गर्दै हुलाकी राजमार्ग अन्तर्गत राप्ती नदीस्थित सडक खण्ड निर्माण नहुँदा आवागमनमा समस्या हुदै आएको भन्दै स्थानीयवासी र जनप्रतिनिधिहरू विगतदेखि नै सडक निर्माण गर्न माग गर्दै आएका छन् ।
‘राप्ती पुल र सडक निर्माणको ठेक्का लागेको छ, काम कछुवाको गतिमा भइरहेको छ, सडकमा चारैतिर खाल्डाखुल्डी मात्रै छन् । दैनिक सवारी दुर्घटना भइरहेको छ,’ गाउँपालिकाका अध्यक्ष शैयद इस्तियाक अहमद शाहले सोमबार सार्वजनिक आह्वान गर्दै भन्नु भएको छ, ‘सडक बनाइदिन सडक डिभिजन कार्यालय बाँकेलाई पटक–पटक आग्रह ग¥यौँ,। तर सडकको निर्माण हुन सकेन ।’
सडकको दुरावस्थाका कारण दैनिक रुपमा दुर्घटना हुदै आएकोले ७ दिन भित्रै सडक निर्माण नगरे हुलाकी सडकमा नै अनशन बस्ने बताउनु भयो ।
हुलाकी राज मार्ग निर्देशनालय नेपालगंजका प्रमुख लिला भण्डारीले नरैनापुर गाँउपालिकाका अध्यक्षसँग समस्या समाधानका लागि कुराकानी तथा सरसल्लाह भइरहेको बताउनुभयो । उहाँले उक्त सडकलाई ग्राबेल गरी यात्रुलाई ओहोरदोहोर गर्न सहज बनाउनका लागि यथाशिघ्र काम थालिने प्रतिबद्धता व्यक्त गर्नु भयो ।
सडक डिभिजन कार्यालय नेपालगंजका प्रमुख नरेन्द्र भट्टले हुलाकी सडक जिर्ण बने पछि स्थानीयले सास्ती खेप्नु परेको प्रति चिन्ता व्यक्त गर्दै उहाँले भन्नुभयो, राप्ती नदीको पूर्वी खण्डमा पर्ने निर्माणाधिन पुलको निर्माणका लागि ठेक्का पाएको लुम्बिनी–रौताहा वन्दना भगवती जेभी कन्ट्रक्सन प्रालिको ढिलासुस्तीका कारण सडक निर्माण हुन नसकेको उल्लेख गर्नु भयो । भट्टाले भन्नुभयो, हुलाकी राज मार्ग निर्देशनालय संग समन्वय गरी तिन दिन भित्रै सडकको निर्माण हुने जिकिर गर्नु भयो ।
खाल्डाखुल्डीलाई समेत पुर्नेतर्फ वास्ता नगर्दा सवारी आवतजावतमा समस्या मात्र होइन, दुर्घटनाको जोखिमसमेत बढाएको छ । खनेर छाडेको सडकका कारण वर्षायाममा हिलाम्मे र हिउँदमा धुलाम्मे भएर हिँड्नुपर्दा स्थानीय आजित भएका छन् । निर्माण कम्पनीले काममा ढिलाइ गरेपछि स्थानीयहरूले पटक–पटक विरोध गर्दै आएका छन् । तर, सरकार र निर्माण कम्पनीले कुनै सुनुवाइ नगरेपछि नरैनापुरका अध्यक्ष शाहले अनशन बस्ने चेतावनी दिएका छन् ।