काठमाडौँ । राष्ट्रिय स्वतन्त्र पार्टी (रास्वपा)का सभापति रवि लामिछानेले स्थानीय तहले सुकुम्बासीलाई आतंकित पारेको आरोप लगाएका छन्।
आइतबार पार्टीको सचिवालय बैठकपछि सञ्चारकर्मीहरूमाझ बोल्दै उनले स्थानीय तहले रास्वपाको काँधमा बन्दुक राखेर हानेको आरोप लगाएका हुन्।
उनले भने,’देशभरिका विभिन्न स्थानीय निकायहरूले रास्वपाको काँधमा बन्दुक हानेर अव्यवस्थित बसोबासीहरूलाई देख्यौ तिमीहरूले भन्ने काम गरिरहनु भएको छ। त्यसमा हाम्रो घोर आपत्ति छ।’
उनले स्थानीय तहहरूलाई रास्वपाको नाम जोडेर भूमिहीनहरूलाई त्रसित नपार्नसमेत आग्रह गरे। सरकारले आजै उठाउँछ, भरे नै उठाउँछ भनेर सुकुम्बासीहरूलाई आपत पार्ने काम स्थानीय तहले गरेको उनको आरोप छ।
उनले भने, ‘तपाईंहरूलाई आतंकित पारेर आजै उठाउँछ, भरे नै उठाउँछ भनेर आपत पार्ने काम गर्नुभएको छ। केन्द्र सरकारले त्यो गरेको छैन।’
लामिछानेले कुनै पनि नागरिकलाई घरबारविहीन नबनाइने बताए। विशेषगरी खोला किनारका जोखिमपूर्ण बस्तीहरूलाई सुरक्षित स्थानमा स्थानान्तरण गर्नु राज्यको दायित्व भएको उनको तर्क थियो।
असुरक्षित ठाउँमा रहेकाहरूलाई मात्र स्थानान्तरण गरिने र वास्तविक भूमिहीनहरूको हकमा शक्तिशाली आयोगमार्फत स्थायी समाधान खोजिने उनले बताए।
वालेन्द्र शाह नेतृत्वको सरकारले पछिल्लो केही दिनयता काठमाडौँ उपत्यकाका सुकुम्बासी बस्तीमा डोजर चलाएपछि देशभरका सुकुम्बासीहरू आतंकित बनेका छन्।
