बाँके । प्रतिनिधिसभा सदस्य निर्वाचन अन्तर्गत बाँके निर्वाचन क्षेत्र नम्बर ३ बाट राष्ट्रिय स्वतन्त्र पार्टी (रास्वपा) का उम्मेदवार खगेन्द्र सुनार निर्वाचित हुनुभएको छ।
निर्वाचन अधिकृतको कार्यालयका अनुसार सुनारले २९ हजार ५ सय ५१ मत प्राप्त गर्दै विजय हासिल गर्नुभएको हो। उहाँका निकटतम् प्रतिद्वन्द्वी नेकपा (एमाले) का उम्मेदवार सुमन मल्लले १९ हजार ६ सय १५ मत प्राप्त गर्नुभएको छ।
त्यसैगरी नेपाली कांग्रेसका उम्मेदवार अमर सिंह पुनले १३ हजार २ सय १५ मत प्राप्त गर्दै तेस्रो स्थान हासिल गर्नुभएको निर्वाचन अधिकृत सरोजनिधि वाग्लेले जानकारी दिनुभयो।
अन्तिम मतपरिणामअनुसार सुनारले निकटतम् प्रतिस्पर्धी मल्ललाई ९ हजार ९ सय ३६ मतान्तरले पराजित गर्दै बाँके निर्वाचन क्षेत्र नम्बर ३ बाट प्रतिनिधिसभा सदस्यमा निर्वाचित हुनुभएको हो।
मतपरिणाम सार्वजनिक भएसँगै रास्वपा कार्यकर्ता तथा समर्थकहरूमा उत्साह छाएको छ। विजयी उम्मेदवार सुनारले मतदाताप्रति आभार व्यक्त गर्दै क्षेत्रको विकास, सुशासन र जनताको अपेक्षा पूरा गर्न आफू प्रतिबद्ध रहने बताउनुभएको छ।
