बाँके । राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र शाहलाई सोमबार नेपालगञ्ज विमानस्थलमा समर्थकहरूले भव्य स्वागत गरेका छन् । नेपालगञ्ज आइपुग्ने बित्तिकै बालेनलाई स्वागत गर्न ठूलो संख्यामा समर्थकहरू विमानस्थल परिसरमै भेला भएका थिए, जसले क्षेत्रभर राजनीतिक माहोल तातेको देखियो ।
समर्थकहरूको अत्यधिक भीड र सुरक्षा व्यवस्था पर्याप्त नहुँदा नेपालगञ्जमा तय गरिएको पार्टी कार्यालय उद्घाटन कार्यक्रम नगरी बालेन कोहलपुर प्रस्थान गरेका थिए । तर कोहलपुरमा पनि सुरक्षा व्यवस्था मजबुत नभएको भन्दै बालेनले समर्थकहरूलाई हात हल्लाउँदै फर्किनु परेको र नेपालगञ्ज तथा कोहलपुरमा तय गरिएका सबै कार्यक्रम रद्द गरिएको रास्वपाका लुम्बिनी प्रदेश महामन्त्री निलराज अधिकारीले जानकारी दिनुभयो ।
महामन्त्री अधिकारीका अनुसार, कार्यक्रम रद्द भएपछि बालेन कोहलपुर पुगेका थिए तर त्यहाँ पनि नेपाल प्रहरीले अपेक्षित सुरक्षा व्यवस्था चुस्त बनाउन नसकेपछि कार्यक्रममा सहभागी नभई फर्किन बाध्य भएका हुन् । यस घटनापछि बाँकेका कार्यक्रमहरू स्थगित गरिए पनि बर्दियामा आयोजना हुने कार्यक्रममा सहभागी हुन त्यस तर्फ प्रस्थान गर्नु भएको छ भने आजै टिकापुर प्रस्थान गर्ने तयारी रहेको नेताहरूले बताएका छन् ।
नेपालगञ्जमा देखिएको समर्थकहरूको उत्साह, भीड र सक्रियताले बालेनप्रतिको बढ्दो जनसमर्थन र राजनीतिक आकर्षण स्पष्ट रूपमा झल्किएको छ । छोटो उपस्थितिमै देखिएको जनलहरले रास्वपाको चुनावी अभियान थप उर्जाशील बनेको विश्लेषण गरिएको छ । नेपालगञ्जमा भिड अनियन्त्रित हुँदा रास्वपाका नगर सभापति नबिन बहादुर खड्का र एक जना नाम नखुलेको युवा घाइते भएका छन् । घाइतेहरुको रास्वपाले उपचार गराउने जनाएको छ ।
