बाँके । बाँकेको जानकी गाउँपालिकामा गरिब परिवार पहिचान तथा परिचय पत्र वितरणका लागि वडा स्तरीय गुनासो सुनुवाई सहजिकरण समिति गठन कार्य सुरु गरिएको छ ।
गरिबीको रेखामुनि परेका परिवारहरूको तथ्याङ्क सङ्कलन गरी उनीहरूलाई परिचय पत्र वितरण गर्ने जानकी गाउँपालिकाका प्रमुख प्रशासकीय अधिकृत बासु रानाले जानकारी दिनु भयो ।
भूमि व्यवस्था सहकारी तथा गरिबी निवारण मन्त्रालय अन्तर्गत गरिबी निवारण गर्नका लागि सामाजिक सुरक्षा तथा राज्य र गैर राज्यबाट प्रदान गरिने सेवामा गरिब परिवारको पहुँच वृद्धि गर्न यो अभियान थालिएको हो प्रमुख प्रशासकीय अधिकृत रानाले जिकिर गर्नु भयो ।
गरिब परिवार पहिचान गरी उनीहरूलाई राज्यको तर्फबाट राहत प्याकेज सहयोग गर्ने उद्देश्यले वडा समिति गठन गर्न सुरु गरिएको बताउदै उहाँले सही र सत्यमा आधारित भएर काम गर्न वडा समितिलाई निर्देशन दिनु भयो ।
जानकी गाउँपालिकाको वडा नं २ का वडा अध्यक्ष चन्द्रिका प्रसाद गुप्ताको अध्यक्षतामा समिति गठन गरिएको छ ।
वडा स्तरीय समिति गठन कार्यक्रममा जानकी गाउँपालिकाका कार्यवाहक अध्यक्ष भुमिसरा धिताल, प्रमुख प्रशासकीय अधिकृत राना, सुचना अधिकारी बिकास जिसि, प्रशासन प्रमुख गोपी चन्द्र चौलागाई, वडा सचिव कबिता रेग्मी लगायतको उपस्थितिमा समिति गठन गरिएको कार्यक्रमको संचालन राजेन्द्र प्रसाद बाजपाइले गर्नु भएको थियो
