काठमाडौं । राजावादी आन्दोलनमा हिंसात्मक प्रदर्शन गरेको भन्दै पक्राउ परेका राप्रपाका वरिष्ठ उपाध्यक्ष रवीन्द्र मिश्र र सांसद तथा राप्रपाका महामन्त्री धवलशमशेर राणासहित ४१ जनालाई अदालतले दोस्रो पटक म्याद थप गरेको छ ।
जिल्ला प्रहरी परिसर काठमाडौंको हिरासतमा रहेका उनीहरुलाई काठमाडौं जिल्ला अदालतले बुधबार थप ६ दिन हिरासतमै राखेर अनुसन्धान गर्न आदेश दिएको हो ।
शुक्रबार प्रहरीले पक्राउ गरेकोमा आपराधिक उपद्रव र संगठित अपराधमा ३० जना र राज्यविरुद्धको कसुरमा ११ जना गरी ४१ जनालाई पहिलो पटक आइतबार ५ दिनको म्याद थप गरिएकोमा बुधबार दोस्रो पटक म्याद थप गर्न अदालत उपस्थित गराइएको थियो ।
