काठमाडौं । सत्तारुढ दल नेपाली कांग्रेसका सांसदहरूले संसद्को गतिरोध अन्त्य गर्न पार्टीले पहल गर्नुपर्ने धारणा राखेका छन् । शुक्रबार बसेको संसदीय दलको बैठकमा उनीहरुले संसदमा उत्पन्न गतिरोध अन्त्यका लागि सभापति शेरबहादर देउवालाई अग्रसरता लिन सुझाव दिएका हुन् ।
सांसद प्रदीप पौडेलका अनुसार बैठकमा सुन तस्करी प्रकरणबारे समेत छलफल भएको छ । छलफलका क्रममा सांसद अवरुद्ध हुँदा जनजीविकाका सवालहरू ओझेलमा परेको भन्दै गतिरोध अन्त्य गर्न पार्टी सभापतिले पहल गर्नुपर्ने नेताहरुले बताएका थिए ।
यस्तै, बैठकमा सांसदहरूले राज्यका निकायलाई नै छानबिन गर्न दिनुपर्ने धारणा राखेका थिए । त्यस्तै, सांसद सुनिल शर्मा पक्राउ प्रकरणमा समेत कांग्रेसका सांसदहरूले सरकारले गलत गरेको बताए ।
‘यो गलत भयो, सरकार प्रतिशोधपूर्ण ढंगले प्रस्तुत भएको देखियो । आवाज थुन्ने प्रक्रियाका विपक्षमा कांग्रेस उभिनुपर्छ’ बैठकमा धारणा राख्ने अधिकांश सांसदहरूको धारणा थियो ।
शुक्रबारको करिब १५ जना सांसदले बोलेका थिए । अर्को बैठक आइतबार बस्ने जनाइएको छ । कांग्रेसले संसद्को अवरोध हटाउने तथा संसदमा विचाराधीन र प्रस्तुत हुनुपर्ने आवश्यक विधेयकलगायत सात एजेन्डामा छलफल गर्न दलको बैठक बोलाएको हो ।
