काठमाडौँ । घुस खाएको आरोप लागेका संघीय मामिला तथा सामान्य प्रशासनमन्त्री राजकुमार गुप्ताले राजीनामा दिएका छन्।
उनले आज मंगलबार राजीनामा दिएको सामाजिक सञ्जालमार्पत जानरकारी दिएका हुन्।
कास्की मालपोतको प्रमुख र जिल्लाको भूमि आयोगको अध्यक्ष बनाउन मन्त्री गुप्ताले ७८ लाख रुपैयाँ घुस लिएको अडियो सार्वजनिक भएको थियो। सो अडियो पछि उनको चौतर्फी विरोध र राजीनामाको माग भइरहेको थियो।
‘बिगत केही दिन अघिदेखि निरन्तर मेरो नाम घुस डिलसँगै जोडेर प्रचारमा आएको कुरा सबैलाइ बिदितै छ। कहिलेकाही नखाएको बिष पनि लाग्दो रहेछ। म अहिले त्यसैको शिकार भए। अब लागेका आरोप अनुसन्धान गरी सत्य तथ्य कुरा बाहिर ल्याउन सहयोग पुगोस् भनेर सम्माननीय प्रधान मन्त्री समक्ष सामान्य प्रशासन मन्त्रि पदबाट राजिनामा गरेको छु ।
प्रविधिको उच्चतम प्रयोगको शिकार अब अरु कोहिपनि नबनुन भन्ने अपेक्षा गर्दै आजसम्मा बिभिन्न रुपले आफुलाई सहयोग गर्नुहुनेहरुलाइ हार्दिक धन्यबाद ब्यक्त गर्दछु,’ उनले भने,’अब फेरि एकपटक देश र जनता प्रति थप जिम्मेवारि बोधका साथ पार्टिले दिएको जिम्मेवारि इमान र निस्ठाको साथ पुरा गर्ने प्रतिब्दताको साथ जनताको घर दैलोमा आउने प्रण गर्दछु ।’
