टिकापुर । कैलालीको जानकी गाउँपालिका–६ धर्मापुरस्थित महेन्द्र शिशु माध्यमिक विद्यालयमा ई–पुस्तकालयसहितको आधुनिक पुस्तकालय आज सोमबार औपचारिक रूपमा उद्घाटन हुँदैछ । बिहान ११ बजे हुने उद्घाटन कार्यक्रम गगन फाउन्डेसनका संस्थापक हिक्मत थापा र जानकी गाउँपालिका अध्यक्ष गणेश चौधरीले संयुक्त रूपमा उद्घाटन गर्ने कार्यक्रम तय भएको छ ।
गगन फाउन्डेसनको संयोजन र अफ्रिकाको युगाण्डास्थित रुपारेलिया फाउन्डेसनको मुख्य आर्थिक सहयोगमा निर्माण गरिएको यस पुस्तकालयले विद्यालयको शैक्षिक वातावरणलाई आधुनिक र प्रविधिमैत्री बनाउने अपेक्षा गरिएको छ । पुस्तकालयमा विद्यालयका पाठ्यक्रमसँग सम्बन्धित एक हजारभन्दा बढी नयाँ पुस्तक समावेश गरिएका छन् भने ई–लाइब्रेरीमार्फत १० हजारभन्दा बढी डिजिटल पुस्तक तथा सन्दर्भ सामग्रीमा शिक्षक–विद्यार्थीको पहुँच पुग्नेछ ।
पुस्तकालयलाई प्रभावकारी रूपमा सञ्चालन र उपयोग गर्न नेपाल लाइब्रेरी फाउन्डेसनले गत एक सातादेखि विद्यालयमा प्राविधिक तालिम तथा कार्यशाला सञ्चालन गरिरहेको छ । तालिममार्फत डिजिटल पुस्तकालय व्यवस्थापन, प्रयोग विधि र प्रविधि उपयोगसम्बन्धी ज्ञान शिक्षक तथा कर्मचारीलाई प्रदान गरिएको फाउन्डेसनले जनाएको छ ।
विद्यालयको भौतिक पूर्वाधार तयारीसँगै करिब दस लाख रुपैयाँको लागतमा नयाँ कम्प्युटर तथा आवश्यक उपकरणसहितको ई–लाइब्रेरी स्थापना गरिएको हो । यस कार्यमा जानकी गाउँपालिकाको समेत सहयोग रहेको जनाइएको छ ।
स्वर्गीय साहित्यकार गगनसिंह थापाको स्मृतिमा स्थापित गगन फाउन्डेसनले यसअघि पनि रुपारेलिया फाउन्डेसन (युगाण्डा) र नेपाल लाइब्रेरी फाउन्डेसनको सहकार्यमा अरुणोदय माध्यमिक विद्यालय खैरिफाटा र वीरेन्द्र विद्यामन्दिर माध्यमिक विद्यालय टीकापुरमा ई–पुस्तकालयसहितका आधुनिक पुस्तकालय निर्माण गरी सफलतापूर्वक सञ्चालनमा ल्याइसकेको छ ।
विद्यालय प्रशासनका अनुसार नयाँ पुस्तकालयले अध्ययन संस्कार विकास, डिजिटल सीप अभिवृद्धि र गुणस्तरीय शिक्षामा महत्वपूर्ण योगदान पुर्याउने विश्वास गरिएको छ । स्थानीय समुदायले पनि यस पहललाई शैक्षिक विकासतर्फको एक महत्वपूर्ण फड्कोका रूपमा लिएको छ ।
