बाँके । लुम्बिनी प्रदेशका विभिन्न जिल्लामा भारी वर्षा भएको छ । गण्डकी, कर्णाली र सुदूरपश्चिम प्रदेशका केही ठाउँमा पनि आज ठूलो वर्षा हुने सम्भावना रहेकाले उच्च सतर्कता अपनाउन आग्रह गरिएको छ । यी प्रदेशका धेरै ठाउँमा हल्कादेखि मध्यम र केही ठाउँमा अति ठूलो पानी पर्ने सम्भावना रहेको मौसमविद्ले जानकारी दिए ।
उनका अनुसार अहिले लुम्बिनी सहित वाग्मती, गण्डकी, कर्णाली र मधेस प्रदेशका केही ठाउँमा पानी परिरहेको छ । बिहीबार राती लुम्बिनी र गण्डकी प्रदेशका केही ठाउँमा ठूलो पानी परेको थियो । मौसमविद्का अनुसार आज देशभर नै पानी पर्ने सम्भावना छ ।
भोलि पनि धेरै ठाउँमा पानी पर्ने भएकाले बाढी पहिरोको जोखिम बढेको भन्दै मौसमविद्ले आवश्यक सतर्कता अपनाउन आग्रह गरेका छन । नदी तथा खोला नालामा पनि आकस्मिक बाढीको जोखिम रहेकाले तटीय क्षेत्रका नागरिकलाई सावधानी अपनाउन आग्रह गरिएको छ ।
