बाँके । नेपाल पुलिस क्लबले लुम्बिनी कप अन्तर्राष्ट्रिय आमन्त्रण महिला फुटबल प्रतियोगितामा पाहुना टोली भारतको सिलिगुडी फुटबल क्लबलाई पराजित गरेको छ । दोस्रो दिनको खेलमा सिलिगुडी एफसीलाई ४–० गोल अन्तरले पराजित गर्दै नेपाल पुलिस क्लबले प्रतियोगितामा विजयी सुरुवात गरेको हो ।
पहिलो हाफमा ४–० को अग्रता लिएको पुलिसले दोस्रो हाफमा सिलिगुडीमाथि दबाब बढाई रहे पनि गोल थप्न भने सकेन । पुलिसको तर्फबाट निर्मला उपाध्यायले २ तथा कप्तान निरु थापा र मिना देउवाले १–१ गोल गरेका थिए । म्यान अफ द म्याच पुलिसकी निर्मला भइन् ।
प्रतियोगितामा नेपाल र भारतका गरेर ८ वटा टिमको सहभागिता छ । प्रतियोगितामा घरेलु टिम बाँके–११, सशस्त्र प्रहरी बलको एपीएफ, नेपाल पुलिस क्लब, त्रिभुवन आर्मी क्लब, कर्णाली एफसी, सुदूरपश्चिम एफसी, सिलिगुडी फुटबल क्लब, रौतहट जिल्ला फुटबल संघ टिमको सहभागिता छ ।
बाँके जिल्ला फुटबल संघसंगको सहकार्यमा हुन लागेको प्रतियोगिताको विजेता टिमले ५ लाख ५ हजार ५ सय ५५ रुपैयाँ र उपविजेता टिमले २ लाख ५० हजार रुपैयाँ, ट्रफी, मेडल र पुरस्कार प्राप्त गर्ने आयोजक अन्तरालले जनाएको छ । प्रतियोगिता वैशाख १२ गतेसम्म चल्नेछ । पहिलो दिनको खेलमा शुक्रवार त्रिभुवन आर्मी क्लबले सुदूरपश्चिम एफसीलाई ४–० ले पराजित गरेको थियो ।
